فاونديشن استي لودر دبل وير Estée Lauder Double Wear Foundation // افضل اساس للزواجات p؛

السلام عليكم ورحمة الله وبركاتة ..
كيفكم ان شاء الله مناح ومبسوطين وسعيدين .. اليوم حتكون التدوينة عن فاونديشين استي لودر دبل وير .. كثير كثير كثير طلبتوا مني ريفيو عنه و حقولكم رأي فيه و أنطباعي عنه واقدر اقول رأي المزبوط والاخير فيه لاني ليا فترة استخدمة ومبسوطة فيه

سوا ضجة فكل مكان وتقريبا اغلب اليوتيوبر والبلوقر كتبوا عنه او جربوه .. وانا على المدح اخذته و زي ما اخذ ضجة بالايجابيات طلع كمان بسمعة بطالة ههههههههههه

اول ما اخذته كنت متخوفة جدا وما اخفيكم انو لو ما عندي كلاراسونيك ما اتوقع اخذته لانو سمعت عنه ثقيل ويكتم البشرة ويطلع حبوب وانا اصلا السنتين الاخيرة بشرتي تغيرت 380 درجة

ويلا نبدأ الريفيو اللي بيكون على شكل اسئلة واغلبها انتم سألتوني اياه ؛)

اول شي بوصف لكم العلبة انيقة جدا وتحسي انك منجد اخذتي حاجة انيقة وغالية وهاي اند علبتة قزاز وغطاه ذهبي زايدة جمال و تحصلي 30 مل من المنتج ..  فيه كمان  spf10  .. وبدون مضخة او ضغاط

اش نوع بشرتك ؟
مختلطة .. احس ما يناسب الجافة وممتاز للمختلطة والدهنية


كيف شكله او قوامه ؟
سائل تقريبا ويجف بسرعة

كيف تغطيته ؟
تغطيه كاملة وتقريبا تكفيني طبقة وحدة و اذا حبيت بس على الاثار ازيد شوي و كأني غطيت بكونسيلر و نهايته مطفية

كيف ثباته ؟
ممتاز و استخدمة اذا عارفة اني حطول بالطلعة مثلا يوم حطيته من العصر4 اللين 4 الفجر وولا احلى زي ما حطيته لقيته اخر الليل او للسهرات والزواجات ومهما كانت الاجواء حر برد رطوبة اعاصير ثابت ما شاء الله خخخ


يكتم ؟
ثقيل شوي اللي تبغى شيء زي البيبي كريم انصحها تجرب تتش ايكلا افضل ولا تفكر فيه حتى ههههههههه


هل ضايقك ثقله ؟
اول مرا حطيته شوي ضايقني بس لما شفت الثبات وثقت فيه ثقة عمياء وصار زي العسل على قلبي هههههههههه

كيف استخدمتيه ؟
اوزعة بفرشة فاونديشين وعلى طول ادمجة واطبطب عليه باسفنجة بيوتي بلندر الحب


احلى شيء شفتيه فيه ؟

• الثبات يثبت بطريقة تصدم 
• ما يبقع بالطرحة 
• التغطية ممتازة 

اش عيوبه :

دمار للبشرة لو ما نظفتيه كويس .. طريقتي بتنظيفة امسح وجهي بمناديل ازالة المكياج كويس وبعدها قطنة بمزيل بايوديرما و أغسل وجهي بعدها بكلاراسونيك وارطب لو ما نظفته كويس كذا على طول الصباح اصحى على صديقة جديدة فالمكان اللي ما نظفتو كويس منه .. ومافية ضغاط وهذا شيء شوي مزعج لاني ما اتحكم بالكمية واحيانا ينزل اكثر من اللي احتاجه



من فين اخذتيه وبكم ؟
من باريس غاليري الاندلس سعره حوالي 230 مو أكثر موجود كمان بوجوه وبفافافوم



واللحين ابغى منك اذا جربتيه تقولين رأيك  بكل صراحة هنا بالتعليقات عشان البنات يشوفوا الكومنت ويستفيدون من تجربتك ولا تقولي موحلو وبس اشرحي ليش ما عجبك وابدي رأيك .. اطلقي البلوقر اللي جوتك ههههههههه
واذا عجبك كمان اكتبي عن تجربتك معه ؛)

وبس هذا اللي عندي اليوم وان شاء الله افدتكم ولا شوي لاتنسوا تصلوا على النبي و السلام عليكم ورحمة الله وبركاتة