اساسيات المكياج .. (3) مكياج العيون - الروج // كيف اسوي مكياج العيد

السلام عليكم ورحمة الله وبركاتة ..

كيفكم بنات ان شاء الله كويسين !!

وما باقي من رمضان شيء وبيجي العيد ان شاء الله وبنفرح بشوفة اهالنيا واحبابنا بس فراق رمضان واجوائة صعب 

يلا ان شاء الله نكون قدمنا شيء كويس وينفعنا بدنيانا واخرتنا  .. 

واليوم دخلنا باخر تدوينة من سلسلة كيف اسوي مكياج العيد 

اذا ما شفتي التدوينتين اللي فاتوا ححط لك الروابط هنا واحرصي انك تشوفيها حتكون مفيدة ان شاء الله ..

كيف اسوي مكياج العيد .. (1) الاساس - الهالات السوداء ( الكونسيلر )

كيف اسوي مكياج العيد .. (2) الحواجب - الكونتور والهايلايتر

اليوم حتكون فيديوات لمكياج العيون وان شاء الله تعجبكم .. جبت كم ميك اب ارتست اتمنى تشتركي بقنواتهم وتستفيدي لانهم عنجد ممتعين 

والسر بانك تصيري زيهم التمرين والممارسة طبقي اكثر من مرا عشان يزبط معاكي
الشيء الثاني حاولي تبدأي بالالوان الطبيعية الترابية لانها سهله بالتعامل وما تغلطي فيها ان شاء الله


اللوك الاول ..
اول فيديو حيكون للنو ميك اب ميك اب ( مكياج اللامكياج ) من فيديوات ليزا وحدة جميلة وفديواتها ممتعة وتعليمية بالمرتبة الاولى
فكرته انو ما يكون فيه اي خطوط واضحة مجرد تغطية وتحسين لمنظر البشرة
احسو ما يناسب العيد واجوائة بس اذا انتي ما تحبي المكياج الثقيل او كنتي بنوتة من 14 وتحسي ما يناسبك المكياج الثقيل جربيه وحتحبية ان شاء الله
ولا تقولي ما يحتاج انا  جمالي رباني بليز .. لازم تحطي فاونديشن خفيف و مسكرا وروج مو شرط تكون الوان ثقيلة وواضحة خليكي على الالوان الطبيعية بس زيدي جمالك جمال بالمسكرا والروج الخفيف والبلشر

اضغطي على الرابط تحت ..
'No Make-Up' Make-up Tutorial

اللوك  الثاني ..
من قناة ليزا كمان وهوا مكياج الخمس دقايق البسيط << احس ترجمتي مفقعة
فكرته مكياج بسيط وسريع وناعم اخليكم مع الفيديو
اضغطي على الرابط تحت ..
Chic & Simple 5 minute Make-up Tutorial

اللوك الثاالث ..
دحين بنبدا نثقل وهالفيديو يعلمك كيف تسوي الكات ايس

طبعا انا اعشق هالرسمة و معتمدتها كثير عاد تجي ايام واوقول خلاص بغير اش ذا !!
وارسم وابدع بمكياجي واخر شيء احس اني فاقدتها وارسمها
لكن هالعيد ان شاء الله حسوي لوك بدونها << يااااارب هههههههههههه

هنا ترسم بالقلم انا معتمده معشوقي ايلاينر محمود سعيد بالكات ايس شوفوه بالانستقرام حقي حسابي (ab00la) اخليكم مع الفيديو ..
The Feline Flick - Cat Eye Make-up Tutorial

هنا فيديو ثاني للكات ايس كمان من قناة بكسي وو

وهما اختين يعلموا المكياج و هما اللي انتجوا فرش ريل تكنيك اذا مو غلطانة استخدمت الجل لاينر والفرشة المشطوفة وهادي الطريقة اسهل حاجة بالعالم على المبتدئات وطبقتو على طريقة انجلينا جولي 

اخليكم مع الفيديو .. 

ANGELINA JOLIE MAKE-UP TUTORIAL

وعشان تتعمقي اكثر بالرسمة وتشوفي فيديوات اكثر .. انسخي الكلمة اللي تحت وحطيها باليوتيوب .. 

Cat Eye Makeup

اللوك الرابع .. 

السموكي الجميل .. وهادي البنت مكياجها جميل وناعم ويعجبني مرا اتوقع انها استرالية رموشها تهبل مرا ما شاء الله 

هذا اللوك اسود وبني ومستوحاة من طريقة مكياج كيم كارداشيان 

Kim Kardashian inspired tutorial

وهذا اللوك كات اي بس بالشدو واي لاينر خفيف .. 

Prom Makeup Tutorial

اللوك الخامس ..
من بنوتة جميلة تعجبني عيونها احس ودي اجيبها وامكيجها كمان احلى شيء فيها انها نزلت سلسلة عن دروس ميك اب العيد وكذا ادخلوا قناتها وشوفوها
هذا اللوك اسمه مكياج هوليود غمقت الروج والتكنيك قريب من البنت الاسترالية اللي فوق
'Old Hollywood Glam

اللوك السادس ..
لوك ناعم وتتكلم فيه عن طريقتها لمكياج الافراح .. مرا حبيته ياليت يرجع الزمن واعمل مكياج زواجي بنفسي ههههههههههه

Bridal Makeup Tutorial

طبعا ما حطيت مقاطع كثيرة لاني محتارة بينها صراحة كل قناة حطيتها سواء هنا او بالتدوينتين اللي فاتت حتفيدك ان شاء الله
يعملوا كل شيء من ميك اب لشعر وتقدري تستفيدي منهم مرا مرا

واخر حاجة بتكلم عنها الروج والشفايف 
كيف يطلع الروج حلو !!
 بطريقة وحدة انو تكون شفايفك مترطبة كويس
و عشان كذا لازم تقشريها كويس وتحطي بعدها مرطب ثقيل انا استخدم فازلين وامسحة قبل ما احط الروج ..


وبعدين عشان تضمني انو روجك يثبت اطول فترة ممكنة انصحك وانتي توزعي الفاونديشن على وجهك تمري على شفايفك كمان و بعدين تستخدمي محدد شفايف نفس اللون او لون قريب من روجك اللي بتحطيه

الفيديو هذا نفس طريقتي بس مو دايم اسوي كل الخطوات بس اذا حطيت روج غامق احرص اني اسوي هادي الخطوات عشان تبرز شفايفي وتخليها املا واكبر

Perfect Red Lips & How to Wear Red Lipstick!

واخيرا وصلنا لنهاية السلسلة اتمنى اني افدتكم وتسووا واحد من هاللوكات بكرا صباح العيد اغلبها سهلة وفكرتها الدمج

وصايا اقولها : 

 بالنسبة للعيون ..

• البرايمر اهم حاجة واذا ما عندك استخدمي للاظلال الغامقة قلم كريمي بني او اسود على حسب لون مكياجك 
• وللالوان الفاتحة استخدمي اظلال كريمية وفوقها اللون اللي تحبية 
• او للالوان الفاتحة كمان استخدمي فاونديشن 
• اعتمدي طريقة اللصق اللي على طرف العين عشان يكون مكياجك محدد ونظيف 
• الدمج لا تنسيه 

وصايا للشفايف .. 

• قشريها 
• رطبيها 
• حطي لها بيس ( فاونديشن )
• حدديها بقلم شفايف 
• وبعد ما تحطي الروج اثني منديل ووطبقي شفايفك عليه وارجعي حطي مرا ثانية روج 
• واذا تبغي الروج يكون مات ( مطفي ) حطي عليه بودرة خفيفة 
• اذا تبغي امتلاء لشفايفك حطي قلوس بنص الشفايف 
• مهم جدا تنظفي الاطراف خصوصا لو كان روج غامق لانو بيبين شكلك مهمل ورث لو مو مرتب 

التدوينة هادي يمكن من ثلاثة ايام جاهزة بس النت استهبل عليا وانفصل 

واخيرا اتمنى انكم تدعوا لي وتدعموني سواء هنا او بالتويتر والانستقرام اي سؤال روحي على الاسك او بتويتر 

واساليني .. 

شيء اخير عيديتي رتويت للتغريدة 

ولاتنسوا تصلوا على النبي عليه الصلاة والسلام
والسلام عليكم ورحمة الله وبركاتة ...