اساسيات المكياج .. (2) الحواجب - الكونتور والهايلايتر // كيف اسوي مكياج العيد

السلام عليكم ورحمة الله وبركاتة ..
كيفكم بنات ان شاء الله كويسين .. نتابع السلسلة اللي بدات فيها وكان اول درس يتكلم عن الاساس و حرب الهالات السوداء والكونسيلر
اذا ما شفتيه ححط لك الرابط هنا وتقدري تشوفيه
كيف اسوي مكياج العيد (1).. الاساس - الهالات السوداء (الكونسيلر )


اول شيء لازم تعرفية كيف تزبطي حواجبك بالشكل اللي يناسب وجهك لا تسوية مرا عريضة زي مايا دياب لانها عاملتها كصرعة
مناسبتها لانها تميزت فيها و لا تخليها نحيفة مرا وتطلع غبية تابعي شكل حواجبك الطبيعي


ثاني شيء لازم تعرفية اللون لا تستخدمي الاسود لو كان شعرك فاحم السواد خليكي على درجات البني
بالنسبة ليا وروتيني انا حواجبي الحمدلله مرتبة وما تحتاج تشقير واذا شقرت بيكون للتغير فقط وشيء بسيط مرا للشعرات الصغيرة فوق حواجبي او اللاطراف بس عشان الشبهات فضلت ابعد عنه

المنتجات اللي استخدمها لحواجبي هي :

• برايمر اربن دي كاي 
• بودرة حواجب من ذابودي شوب ناسية السعر 
• تاتو ميك اب فور ايفر اشتريته ب 145 واللحين ب 200 
• فرشة مشطوفة شعراتها تكون ملمومة 
• مسكرا للحواجب  ( انا اللي عندي شفافة من مكياجي ) تقدري تاخذيها من اي ماركة مثلا من اتش اند ام 
• اضاءة ( استخدم ماري لو سعرها 120 ) و استخدم من باليت نيكد فيرجن  واستخدمت اضاءة من مكياجي حرة << صعبة بالتعامل بس تادي الغرض وبودرة عادية للايام العادية للدوام 
• كونسيلر فيت مي ( مو موجود بالصور ) وبس استخدمة للمناسبات 

دحين نجي لكيف ترسمي حاجبك وكيف تعرفي الشكل المناسب ترا مرا شيء بسيط تابعي شكل حاجبك الطبيعي وححط لكم فيديو
اول حاجة لازم تسوي زي هادي الصورة وتشوفي فين بداية حاجبك ونهايته

• اول خط من اليسار يحدد بداية حاجبك .. كيف تسوية جيبي اي قلم وخليه مستقيم جنب ارنبة انفك وبيبين لك وين تبداي حاجبك 
• ثاني خط من اليسار يبين لك وين تكون كسرة الحاجب او الثنية لحاجبك 
• ثالث خط يبين لك نهاية حاجبك وين تكون 

هنا صورتين تبين لك كيف ترسمية وتحدديه كمان

هادي الصورة الثانية اكثر دقة احتاجت بودرة حواجب ووشمع للحواجب كمان وكونسيلر وفرشة عشان تمشط شعر حواجبها 

 حقولكم عن الماركات اللي فيها المسكرات اللي تفتح الحاجب وهي

من : 

• ماك 
• سيقما
• وتاتو درجة فاتحة من ميك اب فور ايفر 

طيب اذا تبغي تفتحي حواجبك وما عندك المسكرا لتفتيح الحواجب مو مشكلة كبيرة

هنا صورة اخذتها من الانستقرام لجميلة عملتها بالفاونديشن  تقدروا تتابعوها وتستفيدوا من تجاربها 

احتاجت بالطريقة هادي لـ : 

• فرشتين 
• مسكارا شفافة اتوقع من اتش اند ام 
• فاونديشن 
• بودرة حواجب من بودي شوب واتوقع الثاني كمان ظل من ماركة اسمها md 

طريقتها مرا حلوة لتفتيح الحواجب ويمكن اجربها قريب بس بعد ما اصبغ شعراتي ان شاء الله

بعد ما تعلمتي كيف تبداي ترسمي حاجبك وتحدديه وتفتحية حوريكم طريقة شبه طريقتي تقريبا 95 بالمية باختلاف الالوان وشوفوا المسكرا اللي استخدمتها لحواجبها من ماك بلون يناسب شعرها الاشقر   ..
فيديو لطريقتي بحواجبي

فيديو ثاني تشرح فيه طريقتها بحواجبها وكيف ترسمها ب بودرة الحواجب والقلم

واستخدمت فيه علبة سيقما للحواجب تلاقوها عند التاجرات ب 350 تقريبا
طبعا لاتقصي حواجبك لانو حرام واكتفي بجل الحواجب بيرتبها لك .. تبدا ترسم حواجبها من الدقيقة الرابعة

وتشرح لك الطريقة اللي كيف تبداي حاجبك وتحددي الثنية او الانحناء ونهاية الحاجب وحواجبي نفس لون حواجبها
تعجبني مرا حواجبها تشوفي شعر وتحسيها طبيعية
فاكرين زمان المسلسلات واللين اللحين الحاجب كانوا سيراميكه يلمع ومافي شعر وعاملينه بالتاتو والمبدعة هدى الخطيب اجادت الحاجب اللامع هذا
<< ابدا الشكل غير مقبول ومو حلو
لا تنمصي حواجبك للاجر وربي بيعوضك خير ثاني شيء لازم تتدربي كثير وحاولي ترسميها كل يوم عشان تتقنيها
وابدأي بالبودرة حقت الحواجب
بس هذا بالنسبة للحواجب ..


ونبدا بالموضوع الثاني ,, الكونتور والهايلايتير
..
استنفدت الحواجب كل طاقتي حاجة ابغى اقولها بموضوع الكونتور والهايلايتر
انسي المذيعات الخليجيات شوي
الكونتور يكون لتحديد الوجة وتعديل العيوب مثلا عظمة بارزة بالانف بطريقة اقرب للطبيعية مو خطوط واضحة للعيان اهم حاجة الدمج الدمج الدمج
ممكن تستخدمين الكونتور لاضفاء ابعاد لوجهك مثلا بتنحفي وجهك وبتبرزي عظمة خدودك او تنحفي انفك
ضروري ضروري ضروري اذا بتستخدمي بودرة للكونتور انها تكون مات مطفية ما فيها لمعه (( شيمر ))
ولازم تتدربي عليها من اللحين
ممكن كمان تستخدمي ستيك فاونديشن ( الكريمي اللي يجي على شكل اصبع في بماكس فاكتر ) ويكون غامق وجاي على بني \
ممكن  تستخدمي بودرة للكونتور والهاي لايتر او اشياء كريمية وسائلة
انتي واللي تحسي انك متمكنة فيه

الاشياء اللي استخدمها انا للكونتور والهاي لايتر :


للكونتور .. 

• برونز شانيل او
• شادو بني على رمادي من ماركة اسمها ماي واي  او 
• شدو من نيكد 1 اسمه buke 

للاضاءة او الهاي لايتر استخدم ..

• اضاءة ماري لو 
• فيرجن من باليت نيكد 1

نبدا بكم صورة تحدد اماكن الكونتور والهاي لايتر واماكن توزيعها

هادي الصورة حسيتها اوفر شوي بس بالدمج خففوه وينفع احس للسهرات

ونجي للفيديو التعليمي للكونتور والهاي لايتر ..
هنا استخدمت طريقة كيم كارداشيان للكونتور والهاي لايتر
اضغطي هنا عشان تشوفي الفيديو

للبشرات الغامقة اضغطي هنا ..

خففوا على الصوت عشان الميوزك .. فضلا لا امرا 

فيديو ثاني للبشرات الغامقة


واخيرا ..
وصلنا لاخر التدوينة اتمنى انكم استفدتوا منها واكون اعطيتكم المعلومات اللي تحتاجوها اذا عجبتكم واستفدتي ولو نص معلومة بليز رتويت للتغريدة
التدوينة الجاية حتكون عن الشفايف وحتكون قصيرة ولطيفة وصغيرة
وبتكلم عن كم رسمة للعيون وطريقة رسمها وفيديوات تعليمية ان شاء الله وما انشغلت
وحيكون فيها رد لاسئلتكم اذا عندكم اسئلة ارسلوها لي على الايميل hejazea@hotmail.com
ولا تنسوا تصلوا على النبي عليه الصلاة والسلام
والسلام عليكم ورحمة الله وبركاتة ..