تصالحي مع نفسك .. !! .. (( خليكي حنينه معاها ))

السلام عليكم ورحمة الله وبركاتة 

كيفكم بنات .. ان شاء الله كويسين 

التدوينة اليوم حتكون بقسم جديد من أقسام المدونة وحبيت اسميه حديث ناعم بيكون عبارة عن فضفضة بيني وبينكم
واذا عجبكم القسم وحابين ندردش سوا اطرحوا مواضيع واللي تبغوه بنتكلم فيه وزي ما قلت بيكون حديث ناعم بيننا ارسلوا الموضوع على تويتر واذا محرجين تقدروا تقولوا لي اياه بالكومنتات بالمدونة او ترسلوه على ايميلي hejazea@hotmail.com


اليوم بتكلم بموضوع مهم جدا ((  عنوانه تصالحي مع نفسك  )) 

مين مننا مامرت بظروف أتعبت نفسيتها او حتى حزت بخاطرها من #كلمة او #موقف او حتى #نظرة
مين مننا ما غلطت مرا بالتعامل مع احد وندمت عليه ..  ومين مننا ما تمنت ترجع بالزمن لورا عشان تعدل كلمة قالتها وحست أنها جرحت اللي قدامها .. ومين مننا اللحين ما تتذكر موقف من المواقف المحرجة واللي كان تعاملها فيها خطا .. !!
و مين منا ما كلفت نفسها فوق طاقتها عشان ترضي الجميع !! 

الخطأ وارد وكلنا نغلط بس المشكلة الكبرى !!

 لما يكون التفكير بانك سويتي خطا او قصرتي يدمرك ذاتيا "

انا من الناس اللي أحاسب نفسي كثير وهذا الشيء كويس ومو كويس 

*كويس بانك تتعلمي من أخطائك
*ومو كويس إذا كان بتأنيب 

وانا أحاسب نفسي وأتعلم من أخطائي لكن يظل ملازمني الألم 

ما أقولكم كيف تعبت من الإحساس هذا 

ومن هنا جات فكرة تصالحي مع نفسك 

عرفت أننا بشر ولابد ما نغلط  وتعلمت باني إنسانة كويسة وتعلمت كمان انو في بعض المواقف لازم اكون شديدة خصوصا لو وصل الموضوع لحياتي الزوجية و أولادي فلابد اكون قوية وقاسية ببعض الاحيان

وتعلمت كيف أوقف بعض الناس عند حدهم لو شعرت أنهم بيتدخلوا بحياتنا 

وأحلى شيء تعلمته اني أسامح نفسي وأبرر لنفسي أخطائي بشرط ما أكررها واتغاضى

اول خطوة سويتها عشان اتصالح مع نفسي :

• اذا بدات الافكار التانيبية (( من تانيب الضمير يعني << سلكوا لي عادي )) اجلس استغفر واستغفر وبعدين اذا اقدر اعالج الموقف عشان ارتاح عالجته واذا ما اقدر انساه .. امسحه .. واقنع نفسي انو الموضوع انتهى
•  وانه ما بيفيدني التفكير واشغل نفسي

• فكرة الكمال :  كل البنات يجتمعون بالفكرة هادي نبغى كل شيء بيرفكت وبالسمبتيك ومترستك اخر رستكة بس مستحيل يصير هذا الشيء والشيء بالشيء يذكر فابحكيكم حكاية صغيرة عني ::

اغلبكم يعرف اني الحمدلله عندي بنت وولد طبعا تزوجت بدري بعد التحضيري على طول شيء صعب انك توفقي بين دراستك وبيتك وحياتك الاجتماعية وواجباتك كنت ما اعرف شيء اسمه عادي تجي مناسبة وما احضر غالبا ما كنت احضر بس زي ما قلت لكم تانيب الضمير احس اني مقصرة والاحساس هذا متعب
كان صعب علي اوفق بين هذا كلو وما اقولكم كنت مدلعة عند اهلي باني ما اشيل كاسة الموية من الارض لا بالعكس
كنا 4 بنات بالمطبخ مع امي ومقسمين الشغل وطبخي كويس ويكاد يكون شبيه بطبخ امي
بالاجازات ما في شغالة ونقسم الشغل بيننا ولاني الثانية بين اخواتي كان الشغل الثقيل مقسم بيني وبين اختي الكبيرة عبير
هيا المطبخ وانا البيت والعكس يوم كذا ويوم كذا
يعني بالمختصر متعودة على المسؤولية ربي يخلي لنا امي ما قصرت بتربيتنا
فكنت احاول اخلي بيتي دايما نظيف من مجاميعو طبعا بالمقابل اهملت دراستي سنة كاملة وانا احضر لمجرد الحضور بالجامعة
لكن عقلي وكل اهتمامي بحملي وبيتي وزوجي الشيء هذا خلاني اتاخر دراسيا وانا كنت من المتفوقات ومستواي جدا طيب
وبعدها انتبهت لنفسي وقفت وحسيت اني لازم ارجع زي اول
كويس اني انتبهت بس بدات المشكلة النفسية منها اللي هيا (( الكمال ))
كان صعب علي اني اداوم من الصباح وما ارجع الا الساعة 3 العصر واجي انظف و اسوي اكل  ومافي شغالة مع غسيل
وواجبات وانشطة واختبارات والطامة الكبرى ...!!!!!!

حامل مرا ثانية فترة مرت الله اعلم كيف كان حالي عنجد وصلت لمرحلة الاكتئاب والجامعة ما يرحمو وضغوطات خارجية سواء من اهلي او الناس
 اهلي شايلين هم دراستي اللي تدهورت وصحتي اللي تعبت
نحف ونحفت وكل الامراض بفترة جاتني تعرفو بعد الولادة كيف يكون الجسم محتاج رعاية ونومي اختفى
والناس اللي بيدققو على كل حاجة فكنت اكرف نفسي كرف الله وكيكلم هدني هد
اكتشفت اني بس اتعبت نفسي وكل هذا اجري ورا فكرة ((( الكمال )))

• اش يعني لو الغسيل اتكوم اسبوع عادي اخر الاسبوع اغسل واطبق او اجيب شغالة !!
• واش يعني لو وحدة من الاستاذات ما قدمت لها واجب ؟؟
• واش يعني لو ما حضرت مناسبة !! مو انا اهم من كل حاجة وراحتي اهم ؟؟ 
• واش يعني لو اليوم ما طبخت شيء واكلنا من برا 
• واش يعني لو اكلنا بصحون بلاستيك !!
• واش يعني لو قالوا الناس ما تجي ما تحضر ما عاد تنشاف !!

بتقوم القيامة لا ابدا كل شيء زي ماهو ما بيتغير 

اخذت قرار مع نفسي وبقوةةة

انا ابغى اتصالح من نفسي 

اللي اقدر اسوية حسوية وما اقصر  و اهم شيء صحتي واولادي وزوجي والباقي ثااانوي وتصالحت مع نفسي وارتحت نفسيا 

وتركت كلام الناس ورايا وصرت ما اتضايق من الكلام والمواقف 

وصرت احاسب على نفسي وانفعالاتي 

و ارتب جدولي بحيث ما اتعب واكلف نفسي فوق طاقتها
واهتم بنفسي
اهتم بنفسي
اهتم بنفسي
اهتم بنفسي

رجعت لمواهبي الاولى  .. رجعت اقرا .. رجعت للمكياج ..  للكروشية .. وللطبخ المدلع .. رجعت اكتب .. ورجعت اضحك من قلب وانزل المولات مع اهلي .. وازور و اوجب الناس بس بحدود
اذا فاضية رحت واذا لا جلست ببيتي .. صرت اخصص لي يوم سميته (( استكنان مع نفسي )) استكن فيه شور ناعم لمدة ساعتين واكثر وعطورات وفيلم كرتون << اطلع الطفلة اللي جواتي
اشغل الشموع 

ارقص اسولف مع نفسي << مو مجنونة بس لازم اتفاهم مع نفسي هههههههههههههههه
رجعت البنت اللي ضحكتها على وجهها ورجعت للحياة رجعت لاحلامي ورجعت احبني واحب البنت العفوية والقوية
وصاحبة الحضور
ياااااااه اش كنت بسوي بزهرة شبابي كنت حدفنها  !!

كلام بسيط وجا بطريقة عفوية مرا يمكن طولت  بس حسيت انو لازم اتكلم  يمكن وحدة اللحين تحس بنفس احساسي زمان وانا بكلامي قدرت اساعدها طبعا كلامي بعيد كل البعد عن التكاسل انا ضد انك تحملي نفسك الجميلة فوق طاقتها بس

اي موضوع ببالكم شاركوني فيه ونبغى نسولف مع بعض ونتشارك الاحاديث الناعمة ..

واخيرا ...
 وانتي يا ترا هل جاء الوقت وتتصالحي مع نفسك ؟؟

وبس لاتنسي تصلي على النبي عليه الصلاة والسلام
والسلام عليكم ورحمة الله وبركاتة .