what's in my bag >> اش بشنطتي ؟؟

 ?? what's in my bag

اش بشنطتي ؟؟

السلام عليكم ورحمة الله وبركاتة 

كيفكم بنات ان شاء الله كويسين ومبسوطين .. 

اليوم البوست عنجد كنت حابة اعملة من اول بس ما احصل وقت وبما اني اليوم سحبت على الدوام قلت اسوي حاجة مفيدة وانزل البوست اللطيف هذا 

اول حاجة هاذي شنطتي اللي استخدمها للجامعة وطبعا الكتب قليلة لانو اخترت اخف يوم اللي هو يوم امس الاحد ما عندي الا مادتين 

وانا اعتمد  على الكتب في ترتيب شنطتي 

دحين بتكلم لكم عن الشنطة .. 

الشنطة من الدو تقريبا سعرها اذا ماخاب ظني 125 مو اكثر 

هادي من قدام مع اني احس وجهها وقفاها واحد يعنيما تحسي انها مقلوبة ههههههههه

وهذا شكلها من ورا 

مافيها ولا جيب من برا زي مو شايفين عشان كذا احس ما يفرق وجهها عن قفاها بشي 

مرا حبيتها الشنطة ونادرا ما اغيرها واعتمدتها تقريبا لخرجاتي وللجامعة كمان 

نبدا نشوف اش فيها بالتفصيل ..

من اليمين طبعا :) دفتر وكتابين جوالاتي محفظة صغيرة اقلام وفلاش ميموري وبنادول وبكلة وبنسة طبعا هي اكثر من بنسة بس ما ادري فين تروح وعلبة كيوت حقت عطر وكريم وعطري العادي وموية وثلاثة شنط << بعدين اقولكم ليش هههههههه 

من فين نبدا ؟؟ 

1) المحفظة ..

من اتش ام سعرها تقريبا 30 ريال فيها بطاقتي الجامعية وفلوسي وبطاقة المستشفى بس .. طبعا هاذي مو محفظة الخرجات العادية وكذا هادي للجامعة بس صغيرة وانا ما اشيل بطايقي كلها وفلوس كثيرة للجامعة تحسباً واحتياطاً عشان ما تنسرق واجلس الطم 

الجيب اللي قدام فيه البطايق واللي ورا فيه الفلوس 

2)  اشياء .. مختلفة 

اقلام واقلام رصاص لا تسألوني ليش كلها ازرق هههههههه اقلامي واقلام صحباتي وبنادول وبنسة وبكلة والفلاش ميموري وعلبة عطر تهبل اخذتها من مكياجي تعبيها انتي حبيتها مراا اذا حابة تاخذين عطر معاك للسهرة لكن كبيرة علبتة تقدري تعبيها وتاخذيها معك او حابة تخلطي كم عطر مع بعض ينفع كمان اخذتها يمكن ب 30 او 20 مو متاكدة 

3)  الاسلاك .. 

الاسلاك معاناة بالنسبة لي قد ما حاولت انظمها ما تتنظم وانا ما اقدر اطلع من البيت بدون شاحن

 ابتليت بجوالين ما يكملون النهار معاي  

احسن فكرة جاتني اني احطها بشنطة وخلصنا من حوستها بالشنطة وخصوصا السماعات حتى بالدفتر تلزق << مزعجةة 

4) الاشياء الخاصة .. 

طبعا هاذي الشنطة ما تطلع من شنطتي الا اذا نسيتها مهمة جدااا بالنسبة لي .. اخذتها من اتش ام وقت التخفيض ب 10 ريال او 5 

فيها الكوتكس مع مناديل اولا لانو صعب تاخدي شنطتك كلها للحمام عشان ما احد يشوف
و لانو احراج تكون مرمية بالشنطة اي كلام اذا احد شافها او شيء
وما تدري متى انتي تحتاجيها او وحدة من صحباتك تحتاجها 

5) الكريم .. والعطر 

طيب ليش عطرين لانو هذاك ريحة وهذا ريحة وابغاها الاثنين بشنطتي مدري ليش هههههههههه 

وكريم من بودي شوب باللوز اظن

مرررررا كويس وحلو بس مع الشمس سمر لي يدي وحيخلص قريب فاللي عندها اقتراح كريم للايدين وفيه spf غير لوكستيان تقولي 

6) الموووووووية .. 

مرا مهمة الموية بس انا دايما انسى اشرب فصرت اخلي علبة بشنطتي على طول والعلبة الصغيرة هادي فيها موية ورد 

فالاول ما كنت احب طعم موية الورد بس اغصب نفسي لانها مرا كويسة للبشرة ودحين صرت اكره طعم الموية بدونها 

7) شنطة الميك اب .. 

الشنطة من سيتي ماكس ناسية سعرها بس ما اظن  تتعدى ال 30 

زي ما انتوا شايفين مليانة هههههههههه 

بس طبعا مو كل يوم استخدم كل هاذي الاشياء بس لاني اطلع بدري فاحط الميك اب لما اوصل الجامعة اخرج من البيت 6 او 6 الا كمان ف مافي وقت يادوب اصلي والبس 

اش فيها .. ؟؟ 

برايمر من ميك اب فور ايفر وبي بي غارنية 

الفرش مع القطن واعواد وبايوديرما >> عشان لو كنت حمسح الميك اب او للتنظيف 

محددات الشفايف وقلوس وروج 

اكحال للعيون بيج واسود و اي لاينر من ريميل ومعشوقي محمود سعيد 

قلم الحواجب 

بلش بنك ومشمشي بس لونو باين غامق بالصورة 

المسكرا وظل اسود 

^ طبعا ما حيمدي اتكلم عن كل واحد بس اذا حبيتوا قولوا لي وحتكلم ببوست ثاني عنها 

وهنا كيف رتبت الشنطة وخليتها تشيل كل اشيائي .. :) 

ودحين بوريكم كيف ارتبها جوات الشنطة الام ههههههههه 

اول شي جوالاتي بالجيبين اللي كانها مفصلة لهم تفصيل ..

وبعدين الكتب والدفتر عشان تسند الشنطة 

وبعدين ارتب اغراضي العلبة الصغيرة حقت موية الورد بالجيب كمان 

وهاذي هيا شنطتي الجامعية حسيت البوست طويل بس اش اسوي اموووت بالتفاصيل واحب اكثر منها فتحملوني رجاء 

هههههههههههه 

ان شاء الله حبيتوه وعجبكم اذا عجبكم ما يحتاج اقولكم انتوا ادرى انشروها حبيباتي 

وإلحقوني بتويتر @ab00la و علقوا هنا .. 

و بس صلوا على النبي 

والسلام عليكم ورحمة الله وبركاتة