ريفيو كريم للهالات السوداء ( ليفيان - كلينك ) + مافالا دبل لاش

السلام عليكم ورحمة الله وبركاتة

كيفكم بنات ان شاء الله كويسين .. اليوم حكمل التدوينة اللي فاتت و اللي تكلمت فيها عن روتين العناية ببشرتي تقدروا تشوفوها على الرابط تحت

 روتين العناية ببشرتي .. ريفيو لكلاراسونيك

اليوم حتكلم عن تجربتي لكريمين للهالات السوداء طبعا ما كانت الوحيدة اللي جربتها بس كانت اكثر شيء كنت متحمسة له وقريت عنو مدح كثير

                                         

الاول كان  ايفن بتر ايس من كلينك اللي على اليمين سعر235 اتوقع ..

كيف كانت تجربتي معاه ؟

اول شيء العلبة باين صغيرة بس تطول صراحة ملمسة جميل و بسب الرأس الحديدي اللي فيه تحسين ببرودة ويريح العين 

 كتبت عنو بالانستقرام .. لاجظت باول اسبوع انو رطب تحت عيني بطريقة جميلة اعتمدته كريمي العناية قبل المكياج ملمسة جميل مرا فإذا انتي تبغي بس ترطيب  بيناسبك لكن كعلاج للهالات السوداء ولا تفكري فيه قرب يخلص و اللحين استخدم كريم ثاني من بنفت لقبل المكياج ويعطيني نتيجة قريبة منه  

اما الكريم الثاني فهو ليفيان للخطوط والتجاعيد والهالات السوداء

من مركباتة زيت السمسم   هذا الكريم حسيت معاه بتحسن بسيط بالهالات بس يظل احسن من كلينك سعره 100 ريال و احلى شيء فيه انو فيه وقاية من الشمس بنسبة 15 و استخدمة يوميا  للجامعة و صرت ما احط مكياج صراحة بالجامعة بعذري خريجة هههههههههه لانو يضايق اذا كنت حتحطي بعده مكياج  يخلي الكونسيلر يتشقق وما يندمج مزبوط عكس كلينك 

احطه مرة او مرتين باليوم على حسب ذاك اليوم كيف مودي بس لازم لازم احطه الصباح للجامعة عشان عامل الوقاية من الشمس 

حرجع اشترية .. اتوقع اني حعتمده بروتيني لين يخلص لان ليا 3 اشهر او اكثر  يمكن استخدمه وللحين ما خلص وشكلة ما بيخلص الا السنة الجاية حجمة قريب من كريم الايدين اللي من بودي شوب الحجم الصغير .. 

الشيء الثاني اللي حبيت اشارككم فيه و تجربتي كانت معاه جمممميلة

هو مافالا دبل لاش اخذته من صيدلية نورة  جنب مستشفى عرفان او بقشان او فقيه يمكن بشارع فلسطين المهم اني (( مو متاكدة << وصف حريم عاد تحملوني ههههههههه
 ب 55 اتوقع  
الفرق شفته من اول اسبوع و استخدمته لمدة 3 شهور او اربع شهور مو يوميا بس ما اقطع عنه اكثر من ثلاثة ايام
جميل جميل جميل  حسيت رموشي صارت قوية الرموش السفلية كثرت 

  .. استخدامه سهل في فرشة مسكرا حطيه  زي ما تحطي مسكرتك العادية المهم تكون رموشك نظيفة تماما .. حبيته وبعتمده طول حياتي وبيكون شيء اساسي من عنايتي 

التغيير اللي لاحظتة بالضبط احس رموشي صارت اقوى بعض الريفيوات تقول رموشهم ارتفعت يعني كانك كابستها بمكبس الرموش انا شفت العكس تماما رموشي كانت مرفوعة و صارت على تحت لازم اكبسها قبل المسكرا 
صار فيه خط رموش واضح .. انا رموشي مو خفيفة و لا قصيرة متوسطة بالطول والكثافة ما شاء الله بالنسبة للطول طولت بشكل جميل وبالنسبة للكثافة صارت رموشي تجنن حتى بدون مسكرا و احيانا للجامعة احطها بدل المسكرا تخلي اثر شفاف فيه شوي شوي بياض بس ما يبين واذا بين حطيت طبقة مسكرا عشان اشيل البياض 

التأثيرات الجانبية ..
ما صادفني اي اثر جانبي .. حبيت استخدامة ومريح 

سمعت انو يسبب جفاف تحت العين ما لاحظت يمكن لاني استخدم كريمات مرطبة 
سمعت انو يسبب احمرار وبرضو ما لاحظت 
وسمعت كثير بس الحمدلله تجربتي كانت ناجحة معاه مية بالمية الحمدلله  

........

وبس هادي هيا تدوينة اليوم اتمنى انها عجبتكم حسابي بتويتر و الانستقرام والاسك هو 
ab00la
فالنص مو دبل او لا زيرو (( صفر ))
و لا تنسوا تصلوا على  النبي علية الصلاة والسلام
والسلام عليكم ورحمة الله وبركاتة