اطفالنا و رمضان // تجهيزاتي لرمضان

السلام عليكم ورحمة الله وبركاتة


كيف حالكم وهاذي التدوينة اللي وعدتكم فيها وانها بتنزل عن تجهيزاتي لرمضان و اللي بتكلم فيها كيف نستقبل رمضان أنا و اولادي

فالله يعينني و اقدر افيدكم ولو شوي يلا نبدأ بسم الله :




اول شيء انا ابدأ مو خبيرة ولا طبيبة نفسية ولا اي شيء رسمي هههههههه انا بس ام اتبعت طرق مع اولادي و حبيت اشاركم هيا
مو ابغى اوريكم اني  أنا واو و الام المثالية  واخر حبة .. لا ابدا من فينا مثالي اصلا

سبق وقلت للبنات فسناب شات انو رمضان هالسنة غير بالنسبة لي و أني من فترة ما حسيت برمضان لاني كنت مشغولة ومكروفة بدراسة او حمل او ولادة هههههههه

من تزوجت فقدت الروحانية فرمضان لسبب واحد الكرف و الانهاك والشغل الكثير .. ليش رمضان مربوط بالتعب ؟ ليش معد نستقبل رمضان بفرحة وحب ؟


ولأنه اول رمضان لي فالبيت وفاضية ما عندي شيء قررت اسوي شيء لاولادي .. شيء مادي نستقبل فيه رمضان .. اولادي اعمارهم  4 و 5 سنوات .. ما احسهم يعرفوا رمضان ولا يتذكرونه لانو كان شهر زي باقي الشهور ناكل على المغرب و ننام ولا نطلع ما اتوقع عمرهم حسوا بالجو

و الاطفال فالسن هذا لينين و مرنين جدا و اي شيء يشفطوه زي الاسفنجة .. احكيكم عن شيء صار لي وسويته معاهم

اول شيء انا بنتي قد قلت لكم انها لما تسمع صوت القرأن او الاذان  تبكي و تخاف لحد ما اغيره .. انقهرت ليش يا بنتي خفت عليها مرا و
خوفي الاكبر انو الخوف هذا يكبر معاها  لان  القران في الطمأنينة والراحة و الموضوع هذا منجد ما كان يخليني انام
و الشيء اللي قهرني اكثر اني اصلا ما قد الحيت عليها تسمعها ولا شغلته غصبن عنها يعني مثلا بتتفرج شيء فالتلفزيون واقول لا بحط على القران ابدا !

و استمر الموضوع هذا فترة تقريبا سنة وكان عمرها 3 سنوات وشوي .. ابدأ ما ضغطت عليها وقلت لها لا لازم وحرام عليك وعنفتها .. تركت الموضوع يهدا و هوا فبالي ما راح .. بس اخذت وقتي عشان افكر اش اقدر اسوي

وبعدين اكتشفت ليش بنتي تخاف و تتوتر لما تسمع القرأن لا احد يقول عين او سحر بسم الله عليها ما فيها شيء .. السبب اني لما كنت اروح الجامعة يكونوا غالبا نايمين فغرفتهم و تجي عمتهم تشغل التلفزيون على قناة القران السعودية او لما يكونوا صاحيين ويلعبون مع عمتهم وبعدين ينامون تحط على القرآن و تنزل بيتهم تحت فلما يصحوا ما يلقوني ولا يلقون عمتهم و يشوفون القران خلاص ارتبط بمخهم قران يعني ما في احد عندنا ماما مو فيه واحنا لوحدنا و يقعدوا يبكوا خصوصا بنتي لانها كانت تفهم اكثر من ولدي

ولما عرفت سبب المشكلة عرفت الحل .. وقفنا معد نشغل القرأن طول الوقت بس طبعا مو ابد الابدين لا .. بديت احكي لهم حكايات من القران و اقرأ السورة عليهم وافهمهم اياها و بعدين اشغل قاريء يقرأها وما اطول و الصوت يكون واطي مو عالي وبعدها نسوي كيكة ونشغل شمعة مكافأة للي حفظ
و لا تستني منهم يكونون حافظين القصة بالزبط .. بالعكس ممكن يشغلوا خيالهم ويحكوا شيء من عندهم و ارجعي صححي لهم القصة مرة ومرتين وعشرة

هل الموضوع هذا متعب ابدا كنت يمكن مرا فاليوم بس احكيهم وبعدها اخليهم يسمعوها  و ركزت على قصة اصحاب الفيل لاني ابغى اربطهم بمكة كمان وكنت اقولهم وانا احكيهم مكة حقتنا مدينة مكة حقت المسلمين و النبي محمد صلى الله عليه وسلم كان عايش هناك  .. الحمدلله القرأن معد يخافون منهم وارتبط عندهم بشيء يحبوه القصص

ربي الهمني اننا نروح مكة و اربط لهم الاذان بشيء حلو كمان .. طبعا بدانا نوصف لهم الحرم انا وابوهم ونقول كيف شكلو وكيف لما رحنا واحنا صغار كيف انبسطنا و شفنا الكعبة و كانت كبيرة وحلوة .. ونأشر على المأذن واحنا فالطريق ونوريهم كيف شكلها من بعيد .. اكثر شيء كنت مرعوبة منه انهم ينفجعوا من صوت الاذان لانو فمكة الصوت اكيد بيكون عالي فوق ما هما يتحملوا او متعودين  .. فطول الطريق وانا ادعي يارب ما ينفجعوا يارب  هههههههههه سمعتهم اذان مكة فالسيارة بصوت واطي  وكل شويا اعلي الصوت حبة .. وصلنا مكة الحمدلله ووقفنا  عند الفندق  .. نزل ابوهم يحجز و انا واياهم فالسيارة ودخل وقت اذان العشاء .. وكنا عند الحرم على طول بديت اقول لهم ذحين نسمع اذان مكة الحلو و أشر لهم على الحرم و عجبهم الحرم طبعا لانو مكان جديد عليهم واول مرا يشووفوه ما اقولكم كيف كانو منبهرين .. و أذن العشاء و ارتفع صوت الاذان وفكيت شبابيك السيارة عشان يسمعوه مزبوط .. واكتفيت انهم يسمعوا  الاذان بس ما وديتهم للصلاة صلينا فالفندق انا واياهم وبعدين نزلنا الحرم وطفنا وصلينا وبعدها اشترينا لهم ايسكريم وحلاوة وعصير ابغى اربط لهم الحرم بحاجات حلوة .. يمكن فيه ناس يهاجموني وانو خلي حبهم خالص وعبادة خالصة بدون ماديات
الاطفال يحبوا الاشياء المادية و الحوافز و المكافأت خففي من الاشياء الغيبية .. ما اقولك لا تقولين لهم الجنة اش فيها وكذا لا ابدا بس خليكي واقعية اكثر .. وحبة حبة حبهم بيكون باذن الله خالص

ومن البكرا نزلنا وصلينا و اول ما سمعوا الاذان ما اقولكم كيف الابتسامة والضحك والوناسة اللي كانو حاسين فيها وبعدها رحنا واشترينا لهم ايسكريم وهدايا صغيرة عليها صورة مكة وكل ما شافوها اللحين يطلبون نوديهم مكة  ,,  و ركبنا  سيارتنا وطلعنا من مكة ورحنا البحر وخليتهم يتسبحوا ..  و حاولت قد ما اقدر اخلي هاليومين مميزة لهم ويبغونها نعيدها


اللي استفدته من هذا كله الحمدلله معد صاروا يخافوون من صوت الاذان والقران بالعكس يحبونه ويبغوني اخلي احيانا عشان يشوفوا الكعبة


وفيه محاضرات سمعتها قبل اسبوع لطارق الحبيب اكتبوا فاليوتيوب اطفالنا ورمضان طارق الحبيب

ومن هنا عرفت ان هالاسلوب ناجح و بحببهم اكثر بالدين كذا .. يمكن اكون غلط مدري بس منجد هالاسلوب افادني كثير


ويلا نشوف صور التجهيزات اللي طولت وانا اقرقر وما حطيتها خخخخخ

قررت ازين البيت و اشتري سفرة رمضان وفوانيس و كذا اعيش اولادي الجو الرمضاني

هالصورة فيها الفانوس المعتاد ( على اليسار ) و الثاني اخذته وافكر اعلقة و احط فيه اشياء لكل يوم لههم حلاوة او كتيب قصة فيها وكل يوم يفتحوه وياخذوا الشيء اللي مخبيته لهم  .. الفانوس من البلد و الثاني القفص من البشوات
طبعا اخذت المفرش والمثلثات اللي ورا ما صورتهم لحالهم بس فهمتوا الفكرة << الاثنين اخذتهم من بسطة الرحمانية بالصواريخ الشعبية

هاذي حفلة هههههههه مساجد ومكتوب عليها رمضان كريم وتنور ناوية احطها فغرفتهم واكيد حينبسطوا عليها .. كمان من البلد

وهاذي الكرتونة اللي ححط فيها هدايا الاطفال اللي بيجون بيتي اولادي واولاد عايلتنا كلهم  من البلد كمان

ححط هدايا للاولاد و البنات

البنات اخذت لهم :

بناجر بس لاسف ما حسبت حساب انو في بنات كبار نسيت هههههههه اخذت على حجم بنتي بس فيه كمان اساور للكبار
بلالين واخذت اصغر شيء عشان ما يفجعونا ويزعجونا فيها  وحلاوة جيلي  وريال وفانوس ذهبي .. كلها بحطها فالكرتونه


الاولاد :

كورة - بطريق - فانوس فضي - بلالين - ريال - حلاوة جيلي

وهذا عقد لمبات بعلقه فالصالة او يمكن على مدخل البيت لسا ما قررت اخذته من محل باوزير اظن اسمه بسوق محمود سعيد


و أخيرا القمر والنجمة 

أخذته من البلد ..


لا تسألوني عن الاسعار لاني ناسيتها للاسف ..

اش ناوية اسوي استعداد وتحضير نفسي لاولادي حنعد قبل رمضان ب 10 او خمسة ايام ححسسهم انو في شهر جميل جاي و بخليهم يحضرون وينظفون البيت معي و  نطلع الصحون و اقولهم اش حنطبخ وكيف بنستعد و أعطيهم حلاوة

وليلة رمضان حقولهم خلونا نستنى القمر اذا طلع يعني رمضان و اذا اكيد حيجي بعد بكرا يحبنا ما حيتأخر ان شاء الله
و اذا صار رمضان علموهم دعاء رؤية الهلال وهو :(( اللهم اهله علينا بالامن والامان والسلامة والاسلام ربي وربك الله هلال ورشد و خير )) حخليهم يطلعوا مع ابوهم يشتروا اغراض بسيطة من البقالة استعدادا لبكرا

عيشوهم الجو .. و قبل الفطور خلوهم يجهزوا الصحون معاكم و ناوية اخلي لهم هدية اول يوم سجادة صلاة
وناوية اسويها بنفسي لاني شفت اسعار خرافية فالسجادات :) سجادتين بتكلفني 500 ريال  ليش خخخخ

بفصل لبنتي الشرشف عند خياطة و السجادة بنفسي بسوويها


فالاخير ترا الاطفال ما يبغوا شيء فخم ومكلف بس حسسيهم بجو رمضان قد ما تقدري ولك اجرك ان شاء الله

الصيام :
لا تغصبيهم على الصيام ويحسوا انه عبء عليهم وتعب و يكرهوه خلوهم يصوموا ساعتين ثلاثة وعلموهم اش الهدف من الصيام عشان لما  يصيروا   كبار 7 او 9 سنوات يكونون متعودين ويقدرون يتحملون واكيد بالحوافز المادية كمان بس مو دايم

الصلاة :
خلوهم يصلون جنبك لا تتوقعي منهم التزام كامل بالصلاة انو يوقفون جنبك لو ركعه وحدة خير والحمدلله


القرآن :
اقرأي معاهم سور صغيرة وبسيطة واشرحيها لهم


السنة النبوية :
حكيهم قصص عن الرسول عليه الصلاة والسلام مع الاطفال و حببيهم فيه اكثر واكثر وحاولي تكون القصص عن رمضان

الصدقة :
 علموهم يتصدقوا على المساجد اللي جنبكم على العصافير والبسس

ترا كل ما كان طفلك صغير كل ما كان اسهل لك تتعاملي معاه و تعلميه وتغرسي فيه حاجات كويسة ومهما سوا بعدين حاجات غلط ما دام زرعتي فيه حب الله والخوف منه بيحاسب نفسه وبيرجع طال الزمن ولا قصر و احتسبي كل اللي تسويه عند الله و استودعيهم الله لاننا اللحين فزمن كل فتن احرصي عليهم وعلى تربيتهم لانك محاسبة عليهم

وبس هذا اللي عندي يارب نكوووون امهات صالحات ونقدر نربيهم تربية صحيحة لو علمناهم الدين الصح ما كان شفنا الانحرافات العقائدية من تطرف وغيره ولا انحرافات اخلاقية من شذوذ و ظلم والخ .. حصنيهم واشكري الله على النعمة اللي ربي رزقك فيها



لا تنسون تشاركونها مع الامهات اذا عجبكم كلامي طبعا و شاركيني هنا فالتعليقات عن تجهيزاتكم وافكار سويتها لاطفالكم بتفيدون الجميع 


صلوا على خير المرسلين والسلام عليكم ورحمة الله وبركاتة