مكرونة بالكاري والجبنة // دجاج بالترياكي

السلام عليكم ورحمة الله وبركاتة

كيفكم بنات ان شاء الله كويسين واليوم التدوينة بتكون فقسم مطبخي بقولكم وصفة سريعة وسهله بس قمة قمة اللذاذة
وفيها الذ الاشيااء اللي احبها فحياتي واللي هي جبنة و كاري ومكرونة .. معليش يعني الجبنة مع كل شيء تنأكل احبههههها
و المكرونة ما  يحتاج عاد ما اتوقع فيه احد ما يحبها والكاري اللي فكل طبخة احشره هههههههه

قد نزلت تدوينة عن مكرونة بالاجبان تلاقوها فالرابط تحت  طعمه جدا ويمي وكثير جربوها و قالوا لي انها عجبتهم
 http://ab00la.blogspot.com/2014/09/blog-post.html


اليوم الوصفة قسمين الاول من عقلي ما اخترعتها ويمكن احد قبلي سواها بس انو يعني سويتها بدون وصفة هههههه

والثاني وصفة يابانية الطعم يمكن اللي ما يحبوا الاكل اللي فيه حلاوة ما يحبوه ف حبدأ بالدجاج

** التصوير تصوير جوال فا اعتذر مسبقا لو ما كانت واضحة

المقادير :

**الصورة لمقادير الطبخة كلها ناقصة البهارات 

صوص صويا ملعقة  كبيرة
صوص ترياكي ملعقتين
سومطرة
فلفل اسود
ملح
زيت
ليمون
سمسم محمص ترشيه على الدجاج بعد ما يستوي بس للاسف خلص من عندي ولا بيطلع الطعم غريب وحلو


الطريقة بسيطة جدا تبلي الدجاج بالملح والفلفل و سخني قلاية وحطي فيها ملعقة زيت و حطي الدجاج

بس تكون الحرارة عالية عشان يتحمر  من برا دقيقة على كل جنب وبعدين وطي النار على الاخير وخليها 10 دقايق

 وشيليه من القلاية وبعد كذا اخلطي الصوصات و الليمون نص حبة مع بعض وحطيها  باالصاج  او القلاية اللي كان  فيها الدجاج

وخليها تغلي اول ما تغلي رجعي الدجاج وخليه خمس دقايق وخلاص استوا الدجاج وشيليه من الصاج والصوص حطيه بكاسة ولا صحن بس لا تغسلي الصاج

** ملاحظة انا ضربت صدور الدجاج عشان انحفها وتستوي مع بعض يعني الأماكن اللي مليانة  ومربرة دقيتها بالمطرقة تقدري بالشوبك او الفرادة لو تبغي المهم خلي وزنها مثالي ههههههههه

القسم الثاني و اللي هو المكرونة نبدأ ..




المقادير
مكرونة وافضل اي نوع يشيل صوص جوته زي اللي عندي والبيني كمان يمي
ماجي
كاري حطي زي ما تحبي انا حطيت ملعقتين كبيرة
فلفل
كمون
كزبرة مجففة



الطريقة :
حطي كل المكونات مع بعض وخليها تغلي لحد ما تستوي وانا احبها مستوية تماما


الجبنة :

جبنة 3 ملاعق تقدري تقللي وتكثري زي ما تحبي
قشطة العلبة كاملة
كاري بس مو كثير ملعقة بس
وفلفل اسود

اخلطيها مع بعض وخليها لما تستوي المكرونة وبعد ما تستوي صفيها و حطيها فالصاج اللي سوينا فيه الدجاج اللي باقي فيه شويا صوص وحركيها وضيفي خلطة الجبنة و خليها 3 الى 5 دقايق بس و طفي النار و خلاص خلصت طبختنا الفخمة اللذيذة المزيج بين الهندي والياباني خخخخخ

اتمنى تكونون حبيتوا الوصفة لا تنسون تشاركوني تطبيقاتكم و لاتنسون تشتركون بالمدونة من عن   join this site   اسفل الصفحة عشان تشوفوا جديدي

لا تنسوا تصلوا على النبي والسلام عليكم ورحمة الله وبركاتة