ميك اب فور ايفر ارتست شادو - New Makeup Forever Artist Shadows

السلام عليكم ورحمة الله وبركاتة

كيفكم بنات ان شاء الله كويسين .. اليوم وزي مو باين من العنوان جاية اتكلم لكم عن شدوات ميك اب فور ايفر الجديدة و هي مجموعة ظلال جددوها بمناسبة مرور 30 سنة .. ميك اب فور ايفر تعتبر العلامة الرائدة فالالوان .. كان عندهم مجموعة سابقة من الظلال واستبدلوها بهاذي اتوقع

من اكثر الماركات اللي احبها واحسها بروفيشنال و اثق فيها كثير ، ان شاء الله يحصل لي فرصة واشتغل في هالشركة وسبق وقلت لكم اني منجد ناوية نية قوية اني ادرس عندهم وهو هدفي الجاي بس لا تسالوني متى وكيف الا لما اخبركم باذن الله

الاظلال الجديدة اسمها ارتست شادو (( اظلال المحترفين )) اطلقوا مجموعة كبيررررة 210 لون  وبخمس تركيبات او نهايات

اطلقت من 1 اكتوبر في بوتيكات فور ايفر واللي عندنا بجدة بالتحلية وما ادري هل هو مفتوح او قفل والثاني اللي هوا في السلام مول .. ومن 15 اكتوبر نزلوها بكل نقاط بيع ميك اب فور ايفر (( سيفورا - وجوه - فافافوم )) لما رحت امس سيفورا قالت لي انها جديدة ودوبها قبل كم يوم نزلت ..

طبعا ال 210 لون ما نزلت كلها بنقاط البيع العادية اللي حابة تشوف الالوان كلها تشوف بوتيكاتهم متوفرة كل الالوان

رسلوا لي اياها ميك اب فور ايفر مشكورين قبل العيد لكن تاخرت في استلامها بسبب دي اتش ال << اكرههم :(

و من اول نظرة ومن اول لمسة وقعت بغرامها تركيبتها الاساسية جل باودر والالوان مرا صبغتها عالية (( بجمنت واضح )) لكل الوان البشرات اللي تشوفيه بالعلبة هو اللي بتشوفيه على عينك
ثابتة بدون برايمر وتثبت اكثر ببرايمر ..  تندمج بسرعة اكثر شدو بحياتي جربته سهل بالدمج ثلاث حركات بفرشة دمج ويندمج زي الحلم الاسود نعرف كيف صعب بالدمج بس حقهم يندمج بسرعة خيالية

كرهت اني حبيتها من اول استخدام ما احب كذا هههههههه خصوصا لما ما اكون انا مشتريتها .. في لون بني اقولكم استخدمته اول ما فتحتها بالبيت لحواجبي ومن بعدها يوميا صرت استخدمه ثابت و اللون جمميل و غامق بس بطريقة ناعمة احسو انسب لون للشعر الاسود

حشارككم بصور من البوتيك اللي بالسلام و بتشوفوا الكمية المهولة من الالوان حتى ما قدرت اسوي سواتشات لاني احترت فقبل ما تروحي قرري اش الالوان اللي حابتها بنيات او عنابيات او ازرق وزي كذا بيسهل عليك الاختيار


تصوير جوالي

العلب تجي مفردة ومزدوجة وثلاثية وكلها بنفس السعر 30 - 35

وممكن تاخذيها بدون اذا حابة لون او لونين .. العلبة اللي تجي فيها عملية وحلوة بلاستيك وتقفل مزبوط بس احس مو امنة مو صديقة للسفر
هاذي هي  العلبة اللي يجي فيها الظل .. ما يحتاج اتكلم عن الحجم لانو منجد كبير توقعت شيء اصغر يعني قريب من ماك و قيك بس اتفاجأت انو اكبر احس الكمية كبيرة و تطول

النهايات او الفنشس او التركيبة خمسة انواع :

المطفية ورمزها قبل الرقم m 

الساتين ورمزها قبل الرقم s

الايردست ورمزها قبل الرقم i

الميتالك ورمزها قبل الرقم me 

دايموند ورمزها قبل الرقم d

عندي منها كلها و اكثر شيء حبيته الايردست و الساتين والمات .. مو انو الباقية مو حلوة ابدا لا بالعكس تجنن بس هاذي عجبتني اكثر 

يلا نبدا باللي عندي :


وبالصورة هاذي اوريك العلبة المفردة و العلبة اللي تجي معاها ..

اول لون اللي هو s-616 :

هذا اللون اللي اقولكم استخدمه لحواجبي  ثابت وواضح ، باين فاتح بالصورة بس هو اغمق من كذا .. لما كنت استخدم بودرة لحواجبي لازم قبلها شمع الحواجب او برايمر اربن دي كي عشان اضمن انو يثبت كم ساعة .. اما هذا ثابته كان تقريبا اربع او خمس ساعات بدون برايمر 

نوعيته ساتين 

الباليت  الثنائي :

اول لون me-122 

فضي نوعيته ميتاليك لامع واللون واااااضح جدا 

ثاني لون I-752 

مشمشي ينفع كبلشر كمان نوعيته ايردست 

الباليت الثلاثي :

اول لون M-100 

اسود ونوعيته مات سهل بالدمج زي ما قلت بس سواده مو فاحم مرا ، مرا يناسب السموكي ومو متعب الدمج فيه 

ثاني لون D-652 

بني نوعيته دايموند فيه قليتر ويطيح القليتر بس ما يختفي جمممميل اللون وحبيته مع اني لما شفته بقليتر قلت ما اتوقع يعجبني اصلا مستحيل هههههه 

ثالث لون S-516 

لؤلؤي بيج تقريبا نوعيته ساتين استخدمته اضاءة لحاجب وقلو للوجة ومرا كان ناعم وجميل وخفيف 

الباليت الثلاثي هذا سويت منه ثلاث لوكات 

• لوك صباحي باني استخدمت اللون اللؤلؤي على كل الجفن و على عظمة العين البني 
• ولوك سموكي ناعم وزعت اللون البني على كل العين وزودت على عظمة العين و صار كاني حاطة ثلاثة الوان شادو ولتحت الحاجب استخدمت اللؤلؤي 
• واخر لوك السموكي الثقيل اسود على الجفن المتحرك و على العظمة البني الدايموند وتحت الحاجب اللؤلؤي 

طبعا بما اني حبيتها رحت و اشتريت الوان عاجبتني ونفسي فيها و احترت جدا وما رحت البوتيك لاني بحتار اكثر هههههههه

رحت فافافوم واحترت وجلست متنحة خمسة دقايق بين لونين 

وطلعت بهذا الباليت الثلاثي :

اول لون I-838 

موف وردي نوعيته ايردسنت مرا عاجبني اللون 

وثاني لون I-550 

احسو رمادي فيه شوي بني وشوي عنابي لون جمممميل مرا 

وثالث لون M-928 

ليلكي اذا قالوا ليلكي مرا حبيته طبعا البارح اخذته وجيت البيت وجربته وسويت نص عين ونمت بالمكياج من التعب  المهم اني لام اجربه لو مكسّوحه ((  يعني عندي كساح )) من غير شر يعني  هههههههه

اخيرا من تحتاجه اذا انتي من اللي ياخذ شدوات مفردة من ماك مثلا اسحبي على ماك لان هذا كميته اكبر و تركيبته افضل و سعره ارخص ماك قرب المية اما شادوهات ميك اب فور ايفر ب 85 ريال و الكمية اكبر  

نصايح بالاستخدام :

1. استخدمي فلات برش المستوية او تلمسي الظل بس اذا كنتتي بتستخدمي فلفي برش لا تحوسي بالفرشة عشان ما يطير اللون بكل مكان ..
2. عاملية برقة لانو من الطف الشدوات بالحياة واللي تطلع بسهولة من العلبة 
3. وتبني بسهولة طبقات على بعض والدمج سهل 

نصايح لما بتروحي تشتري :

1. حددي درجة اللون اللي تبغيه مثلا زي ما قلت عنابيات او بنيات 
2.  جربي كل الفنشات مات او ميتالك عشان تشوفي الاقرب لذوقك 
3. اختاري لون اساسي لكل الجفن ولون للكريس او عظمة العين ولون هايلايت 

اتوقع ما يناسب البنات اللي تبغى باليت كامل وجاهز لانو في بالتيات فيها كذا لون وبقيمة 3 الوان .. بس هاذي الشدوات قيمتها فيها 

اخيرا كيف تطلعيها من العلبة ببنسة الفراتك  ما ادري اش اسمها او بنسة عادية صغيرة كمان او دبوس او ابره او حلق فيه فتحة صغيرة تدخلي الدبوس فيها وتطلع بكل سهولة .. وفالاخيرر هذا رأي لحالي ويمكن لا قدر الله اللي ناسبني ما يناسبك وناوية ارجع اخذ منه الوان كمان وكمان

** قالت لي موظفة سيفورا انو يمكن بيرفعوا سعرها وتصير ب 130 على كلامها طبعا ههههههه بس الله لا يقوله 

بالنسبة للمفاجأة شوفوا الانستقرام المغرب  وان شاء الله تعجبكم .. يسعدكم ربي 

وبس كذا وصلنا لاخر التدوينة وان شاء الله عجبتكم لا تنسوا تصلوا على النبي والسلام عليكم ورحمة الله وبركاتة 

                                           

                                                                  كومنت منك يسعدني 3> 

                                          للتواصل معي HEJAZEA@HOTMAIL.COM 

                                                KIK - INSTA - TWITTER -ASK

                                                                     AB00LA