تغطية ايفنت بنفت .. اول ايفنت لبنفت بالمملكة العربية السعودية

السلام عليكم ورحمة الله وبركاتة ..
كيفكم بنات ان شاء الله كويسين زي مو باين من العنوان التدوينة اليوم تغطية لايفنت بنفت الاول بالمملكة ..

معليش تأخرت بس عادي من متى انا كانت مواعيدي مزبوطه ههههههههههه

 بس عنجد كان شيء جميل عمر والجوهرة و الباقين اكيد كانوا تيم مميز واحلى شيء انهم يعاملونا باحترافية ..

واتوقع شفتو صوري وصور كل البنات للايفنت .. مقهورة اني ما قدرت اصور كويس اول شيء الايفنت كان بجدة في ذا ستور بالتحلية ..
كانت الدعوة على الساعة 4 ونص اللين 7 وخاصة بالمدونات فقط  و شفنا بلوقرز الرياض وكانوا طعمات بشكل مجنون مرا حبابات ولطيفات و عنجد بيوتي بلوقر .. اما بنات جدة شهادتي فيهم مجروحة خلاص صاروا صحباتي من اول .. طبعا ما كانوا يعرفوا وجهي لاني انا و اموله  من النينجا على قول اموله هي الوحيدة اللي ما عرفتها  هههههههههه واضطريت اني اعرف عن نفسي لكل وحدة بس اغلبهم عارفتهم انا .. يمكن جلسنا ساعة ونص او ساعتين بالكثير من كثر ما كنت مستمتعه ما طالعت بالوقت ابد ولا صورت زي الناس .. لاني جيت متأخر و المكان كان مليان بنات هذا اولا و ثانيا اصلا ما صورت كثير لاني كنت اسولف واهرج مو فاضية هههههههههه

جاتنا الدعوة لاننا بيوتي بلوقر و كانوا يبغوا يعلنوا او يطلقوا المنتج الثوري الجديد على كلامهم اللي هو ذا ريل بوش اب لاينر
و كم منتج ثانية ..

اعذروا تصويري الغبي هههههههه شغل العجلة وكان تصويري بالليل فالاضاءة شوي مو مزبوطة و اصلا البنات لما جيت كانوا بدأو  ما شاء الله وصوروا وخلصوا
فلقطت كم صورة بعدين ححط رابط لمدونة وفاء ابدعت ما شاء الله وصورت كل شيء بدقة وترتيب

كان فيه فوتوبوث وتصورنا واستهبنا لين قلنا امين ههههههههههه بس :| ما أحب الفلاش ما احبو ما احب التصوير يسيب عيوني
و فمي وجهي ويصور خشمي بس ويسيب باقي وجهي  مع انو مافي خشم بس الله لا يلوم الفنانات على شغل السمكرة بالخشم ههههههههههه

صور من الايفنت ..

هذا البودي اويل الجديد تبع زبده الجسم او كريم باثينا تعطي لمعه للجسم و ريحة حلوة

هاذي الاشياء والصور و الكتابات اللي تصورنا فيها ..

وطبعا هاذي اشهر من نار على علم .. التنت حقت الشفايف بكل الالوان عندي كلها ما عدا اللولي تنت .. وللاسف ما جربته كمان (( قلب مكسور ))

البنت حقتهم ههههههه م اعرف اسمها اللي تعرف اسمها تقول لي

وهادي صور من تصوير البلوقر وفاء ..

ادري ادري لا عاد اصور ههههههههههههه ظلمته بتصويري عشان كذا استعنت بصديق

هاذي الحاجات الغريبة هي اللي تصورنا فيها اقوولكم بدعنا D:
بس تظل صورتي هبلا ههههههههه

لصور اكثر طلوا على مدونتها
هذا رابط مدونة وفاء .. THE ARTISTIC HANDS


وهنا ابداع بينو حبيبة قلبي حسابها بالانستقرام bayanola92 شخمطت بيدي و عدمتها وبعدين حطت لي xo قلك تراضيني
بس على قلبي زي العسل ههههههههههه

و طبعا هالصورة الجماعية الجميلة و اللي حطبعها واحطها على مكتبي عنجد عنى لي الكثير هذا الايفنت وحبيت بنفت اكثر لانها جمعتنا اولا و عاملتنا احسن معاملة كبلوقرز ..  الخطاط والرسام بالصورة هادي وفاء هههههههههه

فيديوات للايفنت ..
فيديو 1
فيديو 2



دحين نجي للحاجات اللي اعطونا اياها ..

• ذا ريل بوش اب لاينر حتكلم عنه بالتدوينة الجاية باذن الله  حتكون عن منتجات بنفت 
• ذا ريل مسكارا 
• المزيل الخاص فيها ذا ريل ريموفر 
• بوسي بام هاذي جديدة تبع التنت الشهيرة حقتهم 
• تشا تشا بام 
• بيني بام 
• باثينا اويل 
• البيبي كريم الجديد بيج ايزي 

والتدوينة الجاية حتكون عن المنتجات هادي وتجربتي السريعة معاها .. عشان ما اطول عليكم << اطول من كذا مافي ههههههههه

وبس كذا خلصت التدوينة لا تنسوا تصلوا على النبي عليه الصلاة والسلام "" 

و السلام عليكم ورحمة الله وبركاتة ...

 | instagram |