اساسيات المكياج .. (1) الاساس - الهالات السوداء ( الكونسيلر ) // كيف اسوي مكياج العيد

السلام عليكم ورحمة الله وبركاتة 

كيفكم بنات ان شاء الله كويسين .. يالله شوفوا كيف عدا الشهر بسرعة زي الهوا 

يارب اغفر لنا عن اللي مضى وبارك لنا بالباقي منه 

كنت كتبت بالتدوينة حقت القيف اواي اني بسوي تدوينة عن المكياج فقررت اعمله اجزاء عشان اعطي كل شيء حقه وافيدكم بتعمق 

• اول حاجة ابغاكم تعرفوها عني اني مو خبيرة بالماركات وكذا اللي جربته بافيدكم فيه واذا لا بقولكم ما اعرف 
• انا اخذت دورة ميك اب يمكن من قبل 8 الى 9 سنوات 
• ثاني شيء انا الحمدلله من زمان اعمل ميك اب وتقريبا اعرف كل اساسيات الميك بس مالي بالميك اب المبهرج والغير طبيعي اللي بمشاغلنا  
• ثالث شيء حاولت اطبق على طفلة هادي الدروس بس ما حسيت ان الصورة بتوصل فقررت اشارككم بمقاطع فيديو احسن وافيد 
• رابع شيء لو انت شاب بليز مالك بالموضوع اي اهتمام فارحل لو سمحت هش .. هش 
• انا بشرتي مختلطة ف مو ضروري اللي ناسبني يناسبك << من كثر ما قلناها احنا البلوقرز احسها صارت زي العبارة التحذيرية اللي على علب السجاير ههههههههههههههه

يلا مستعدات نبدا الدروس : 

بسم الله توكلنا على الله جهزي ورقة وقلم واكتبي الخطوات والادوات اللي تحتاجيها 

تحضير البشرة للميك اب .. 

• تقشير .. 
• غالق مسامات ( تونر ) .. 
• مرطب اللي يناسب نوع بشرتك .. 

لازم تحضري بشرتك عشان تكون طلتك حلوة بالميك اب 

انا مره بالاسبوع اقشر بشرتي واحيانا كل اسبوعين مرا وعلى حسب بس الافضل تقشري بشرتك قبل الميك اب بفترة مو اقل من 4 ايام فلنضرب مثال العيد ..

 قشري بشرتك يوم 25 رمضان وبعدها استخدمي ماسكات عشان لما يجي يوم العيد تكون بشرتك نظيفة ومرتاحة 

من الماسكات 

المقشر اللي استخدمة (st lves) او ( زبادي وشوفان - احطة اللين ينشف وافركة بنعومة بحركات دائرية ) والتونر على طول بعد التقشير عشان يقفل المسامات اللي انفتحت واستخدم ( كلينك ) او (بودي شوب ) 

والترطيب استخدم ( اولاي توتالي ايفكتس المرطب اليومي ) او ( كلينك )  

ملاحظة : احرصي قد ما تقدري انو ما يكون فوجهك شعر وبالاخص الشنب حتى لو خفيف بيبين بالمكياج 

وبالنسبي لي انا اشيل شعر وجهي بالحلاوة ومرا مرتاحة الحمدلله انتي شوفي الطريقة اللي تناسبك + ممكن الحلاوة تسبب تهيج لبشرتك زي ما الفتلة ما تسبب لي تهيج 

انا مو مسؤولة بس شيلي الشعر عشان يكون الاساس مزبوط وشكلو حلو باي طريقة تناسبك  

البداية الاساسية للميك اب .. 

بعد كذا نكمل يوم العيد تقومي زي الفراشة الحلوة الجميلة وتغسلي وجهك بغسول يناسبها وتقشري شفايفك ب ( زيت زيتون او اي نوع تحبية وسكر ) وتسوي روتينك المعتاد وتحطي المرطب الخاص ببشرتك وتحطي كريم العيون ومرطب لشفايفك

روتيني انا .. هو 

اغسل وجهي بغسول حاليا استخدم كلينك من مجموعة الثري ستيب  وبعدين المرطب من كلينك واحط كريم العيون وبعدها ما انسى شفايفي 

الصورة .. من اليمين مرطب شفايفي سيء وفاشل بس حطيته عشان توصل الفكرة استخدم فازلين احلى بمليون مرا 

طبعا من ضمن روتينك الصباحي ليوم العيد قشري شفايفك عشان الروج يجي جميل وبعدها على طول حطي فازلين 

وبعدين ثاني واحد من اليمين كريم العيون ( من كلينك ) و خلي بشرتك تمتص الكريمات وبعدين ابداي مكياجك 

البرايمر .. 

مرا مهم ويثبت الميك ويقفل المسامات مو مرا بس بنسبة كويسة فية من ذا بودي شوب واتذكر قبل سنتين يمكن اخذت من نكتار كان حلو بس فجأة صار فاشل اتوقع خرب او حاجة استخدمته اختي وهيا بشرتها دهنية ومرا عجبها 

انا اللحين استخدم برايمر من بنفت وطريقة توزيعه على البشرة تاخذي كمية بسيطة على اصبعك وتطبطبي على الاماكن الدهنية ببشرتك واللي فيها مسامات 

وهوا الصورة رقم اربعة من اليمين 

طبعا البرايمر الخاص بالعيون اللي هوا من بنفت كمان اللي لونة بيج رقم ثلاثة من اليمين

 يوعدك بان الشدو ما يتحرك من مكانة 

والكونسيلر كمان وهذا اللي شدني فيه حسيت بفرق معاه وحبيته طبعا هذا بالذات خطوة اختيارية لاني حقولكم عن بديل له 

وهو بالنسبة للشدو حطي كريم اساس وعلى طول حطي اللون قبل ما ينشف مرا الاساس 

الفاونديشن : 

طيب كذا خلصنا الترطيب والبرايمر واللحين على وجهك برايمر بنفت وحتبدأي توزعي الاساس من هنا حبدا اعطيك خيارات 

ارخص بامكانك تستخدمي بتوزيع الاساس ( الفاونديشن ) 

• اصابعك 
• الاسفنج 
• الفرشة 

اصابعك الحلوة ستخدميها اذا تبغي تغطيه خفيفة والاسفنج والفرش لتغطية اثقل 

من اليمين سفنجة  بيوتي بلندر تقدري تستخدميها للاساس والكونسيلر وتوزيعها جميل = بديل رخيص استخدمي الاسفنجات المثلثة بمحلات التجميل للكونسيلر واي سفنجة ثانية مهما كان شكلها لوجهك << سعرها 10 ريال اذا مرا زادوا سعرها وغلوها

البيوتي بلندر بيسيفورا وعند التاجرات ما  بين 80 -100 

ثاني فرشتين من الكبار تستخدم للفاونديشن كمان بس ما شفت احلى من السفنجة 

وثالث فرشة ستخدم لتوزيج الكونسيلر تحت العين وبعدين بالطبطة سواء بالفرشة او اصباعك اللين يندمج مزبوط 

طيب نجي لاساس اللي استخدمه : 

استخدمت من ميبلين فيت مي ومن مكياجي صبايا << اسعارها ما بين 50 الى 80 ريال 

وليا ثلاثة سنوات استخدم ميك فور ايفر اتش دي ولا لي نية اغيره سعره اتوقع 195 وكان بحدود 165 ريال بس الطمع اعوذ بالله 

استخدم انواع كثيرة من البودرة ومنها ميك اب فور ايفر اللي بالصورة طبعا القديمة باين اني حافرتها حفر والجديدةاللي مقفلة بالكامل  نوع ثاني حجربها واقول راي فيها بعدين + البودرة الشفافة 

اما الانواع الثانية استخدمت بودرة صبايا من مكياجي + ماركة md  وحبيتها مرا + افون + فريدريك البودرة الحرة 

فية ستاي مات من ريميل اتوقع ما جربتها بس يمدحوها للبشرات الدهنية + فيت مي من ميبلين وما جربتها كمان 

نجي للكلام المفيد والمهم كيف اسوية وكيف اوزع الاساس ححط روابط لطريقة توزيعه بالفرشة والبيوتي بلندر 

تابعوها  (( وبليز خففوا على الموسيقى ما ابغى ذنوب )) 

اشياء اسويها : 

ارش على البيوتي بلندر فكس بلس 

الاساس احطة على يدي واخد بالاسفنجة واوزعه على وجهي 

توزيع الاساس بالفرشة : 

الرابط : طريقة لتوزيع بالفرشة

توزيع الاساس بالبيوتي بلندر : 

رابط لتوزيع بالاسفنجة

مقطع مو متقن بس اوريكم التكنيك اللي استخدمه تابعوه من الدقيقة الثالثة الى الدقيقة الرابعة واربعة وثلاثين  

وهيا بالطبطبة او التربيت

الكونسيلر : 

ما ادري كيف اشرح الموضوع هذا لكن الهالات اكبر مشكلة ممكن تواجهك بالميك ااذا ما كان عندك هالات فقولي الحمدلله 

معاناتي مادري هيا وراثة او صحية المهم انها مسببة لي احباط جلست فترة اللين عرفت لها مزبوط وصرت اغطيها الحمدلله 

حاولت اعالجها لكن صارت زي بوبو عيني ما تروح بس نقول ان شاء الله ربي يعافيني وتروح 

المهم ما عليكم من سوالفي الكثيرة نبدا 

عندك هالات لازم لازم يكون  عندك كونسيلر كويس + كوركتر اورنج 

( انا مستخدمةروج تقدري تستخدمي اي روج اورانج مات مطفي او اي كوركتر اورانج كخياربالي من ميك اب فور ايفر )

طريقتي : 

• اول شيء كريم العيون 
• وبعدين كوركتر اورنج 
• وبعدين برايمر بنفت 
• وبعدين كونسيلر ماك ولا شيء غير ماك + يمكن اجرب فل كفرج من ميك اب فور ايفر 
• ابخ على الاسفنجة فكس بلس << تثبت الكونسيلر وتساعد بالدمج 

يمكن تشوفوها خطوات كثيرة بس صدقيني اذا عندك هالات بتروح .. 

مالقيت مقطع يشرح مزبوط بس بنفس الطبطة اللي بفديو طريقة الاسفنجة للاساس استخدميها للكونسيلر 

السر بانك تحطي هالطبقات فوق بعض بدون ما يكتل ويطلع كثير الممارسة وكمان حاولي تقللي الكمية اللي تاخديها 

الصورة :

فيها كونسيلر ميبلين فيت مي نفس درجة الاساس وكونسيلر ماك والاسفنجة والفرشة عشان احط من الكونسيلر الطويل 

اما حق ماك لازم ادفيه باصباعي واوزع على الجفن وارجع اطبطب عليه بالاسفنجة 

الصورة الثانية : 
فيها روج من مكياجي جا مع الشنطة اللي رسلوها لي وما حبيت اني استخدمة كروج ما ناسبني بتاتا البتة فصرت استخدمه كوركتر ومرا مبسوطة فيه
زمان كنت بعد الكونسيلر ( ماك ) وقبل الهايلايتر( كونسلر ميبلين فيت مي )  اطبطب بفرشة فلفي حجمها صغير بشدو اورنج تحت عيني بس بخفة مرا عشان ما يتكتل
البودرة البيضاء هادي هيا اللي انا اموت فيها بس يقولو مع التصوير تبين كانوا دقيق على الوجة وانا ما لاحظت هالشيء
احطها تحت عيني بفرشة فلفي ولما اخلص مكياجي احط عليها شوية بودرة حرة بلون بشرتي
الفلفي اللي اقصدها بالصورة اللي تحت

والفكس بلس هو هذا اللي تحت من ماك : سعره 95 ريال 

صورة لتوزيع الكونسلير لو هالاتك بسيطة 

وزعية على شكل مثلث زي الصورة اللي تحت للاضاءة تحت العين

خلاصة تغطية الهالات 

كوركتر  + برايمر + كونسيلر + اضاءة واللي هيا بالنسبة ليا ( كونسيلر فيت مي ) و لازم تحطي عليها بودرة حرة عشان ما يتكتل 

ولا تستخسري تدفعي بالكونسيلر و الاساس  بالذات لانو يفرررررق 

هذا بالنسبة لدرس اليوم وان شاء الله انكم استفدتوا الدرس الجاي حيكون عن الحواجب والكونتور والهاي لايتر

اي تعليق تقدروا تحطوه بالكومنتات تحت وشكرا لكم 

ولاتنسوا تصلوا على النبي علية افضل الصلاة والسلام 

والسلام عليكم ورحمة الله وبركاتة ..