ثقافة المكياج 101 : البرايمر

السلام عليكم ورحمة الله
كثيرررر بنات يحبون المكياج ويحبون يعرفون تفاصيل التفاصيل عنه .. وشغوفين فيه ويكون اما هواية وموهبة او عملها
مو عيب البنت ابدا تحب المكياج وتتثقف فيه وفي مكوناته

انا اليوم جاية بسلسة جديدة واوعدكم تكون اشياء مفيدة ان شاء الله وتفرق معك فاختيار المنتجات بس هذا مو معناته اني بقول كل معلومات العالم لان بحثك وتعمقكك فالموضوع بيعطيك ثراء معلوماتي اكثر


فيلا نبدأ باول جزء فالمكياج و يدخل من ضمن العناية بالبشرة كمان وهو البرايمر ينحط بعد عنايتك ببشرتك وقبل ما تحطي المكياج

مهم تعرفي ان البرايمر انواع ولكل بشرة نوع و لكل مشكلة فبشرتك نوع

البرايمر يكون إما  :

مرطب
يتحكم فالدهون // يخليه مات
يعبي المسامات والخطوط
يثبت المكياج
يضيء البشرة

وانواعه اما :
كريم عصار
لوشن
بخاخ مائي

ونبدأ نشرح اهم الاشياء اللي تعرفيها عن البرايمر ..
المكونااااات اقري المكونات واعرفي البرايمر فيه ايش عشان تعرفي هل ممكن يحل مشكلتك او لا

مثلا انا عندي مسامات و تزعجني وتبين اكثر مع الفاونديشن مع اني بدون فاونديشن ما فيا اروح بختار برايمر اكيد بدور على البرايمرز اللي فيه من مكوناتها سيلكون ليش سيلكون ؟
عشان السيلكون حيعبي المسامات و يخفيها تماما خصوصا لو كانت زي حالتي خفيفة

السيلكون ما يعدم البشرة اللي يعدم البشرة انكم ما تشيلون المكياج لا تنامي ابدا بمكياجك 

او مثلا انا بشرتي جافة جدا و احتاج شيء يرطبها حطالع فالمكونات وحختار برايمر من اول مكوناته الموية او الجلسرين او عنصر مرطب

او مثلا احتاج شيء يثبت المكياج و يطول عمره حدور كمان على اللي فيها جلسرين


ما اعرف اقرأ المكونات ؟  طيب فيه كلمات اساسية منها تعرفي البرايمر يناسبك ولا لا

اذا لقيتي كلمة  Matt // matifiante // oil control

معناتها تناسبالبشرة الدهنية

اذا لقيتي كلمة hydratant // lumiere // moisturizing // nourishing

معناتها تناسب البشرة العادية والجافة

اذا لقيتي كلمة pearl //lumineux // brigtening

معناتها تعطيك نضارة وتنوير

اذا لقيتي كلمة smoothing // lissante // por fill

المسامات والخطوط الدقيقة

مو شرط تلاقين كل هالكلمات بس تلاقي وحدة منها طبعا

و اللي يكون مكتوب عليها كريم ممكن تناسب البشرات العادية والجافة
و اللوشن انسب للبشرات الدهنية لانها تكون خفيفة و فيه برايمرات تعطيك نعومة اكثر للبشرة وايفيكت زي الفوتوشوب زي مثلا حقت سماش بوكس فوتو فنش

اما المائية تناسب كل البشرات بس تنتبهي على الكمية و ما تحطي الخطوة اللي بعدها الا لما ينشفو تماما
مع العلم فيه برايمرات الافضل على طول تحطي الفاونديشن عشان يلصق فيها بدون ما تكون طبقة

عموما المكياج مافيه قاعدات معينه ولكن هاذي خطوط اساسية تساعدك تفهمين المكياج اكثر

البرايمرات موجودة فاغلب الماركات بس اختاري النوع المناسب لمشكلتك


ما حطيت امثلة لاني ابغاكم انتم تقولون لي برايمركم يندرج تحت اي نوع ؟