تجربتي مع البودرات الحرة // السائبة // اللوس

السلام عليكم ورحمة الله وبركاتة .. كيفكم بنات ان شاء الله كويسين
اليوم بإذن الله بتكلم معاكم عن اللوس باودر دردشة خفيفة و بعطيكم ريفيوز للبودرات اللي عندي والبودرات اللي ناوية اجربها قريب

اللوس باودر او البودرة السائبة او الحرة المطفية : هي اللي تجي بودرة منثورة مو مضغوطة فعلبة اكثر شيء يتعب فيها انها تتناثر فكل مكان ولكن من اكثر البودرات اللي تعطي منظر طبيعي جدا واخف على البشرات من المضغوطة .. مع انو فيه نوع من المضغوطة يكون خفيف واذا استخدمتيه بفرشة يعطيك تغطية خفيفة واذا استخدمتيه ببف او اسفنجة يعطيك تغطية اثقل


فيه بعضها تعطي ملمس مخملي وبعضها تمتص الدهون طبعا انا اتكلم من تجربتي .. اول مرا تعرفت عليها قبل 10 سنوات لما درست الميك اب كان الاستخدام الاساسي لها كان اننا نحطها تحت العين بكمية نفس طريقة البيكنج اللحين و الهدف انو لما كنا نشتغل بالشدوات الغامقة نحمي تحت العين من اللي الشدوات اللي تتناثر لا تعدم لنا الكونسيلر و البشرات الجافة نثبت الجبهة والانف وجوانبه ضروري وحوالين الفم عشان نطول عمر المكياج وبفرشه بشكل خفيف اما بالنسبة للبشرات الدهنية اول شيء لوس باودر بشكل خفيف على كل الوجة وبعدها المضغوطة اوالكومباكت



انا في فترة كنت احب الشفافة اللي ما فيها لون وبعدين حبيت البيج و اخيرا صرت اعشق الصفرااا ههههههه عشان تعطيني تنوير لبشرتي ولوني


اول بودرة اشتريتها هي بودرة ميك اب فوريفر اتش دي الشفافة كثير كانو يقولو تعكس بالفلاش بس انا مرا كنت احبها ولاني ما كنت اتصور كثير فما لاحظت المشكلة

العين :
 بدات احطها تحت الاختبار حطيتها وصورت فلاشش وكنت مثبته بس الكونسيلر بكمية خفيفة وما طلع انعكاس او اي منظر مو حلو

لكن لما سويت طريقة البيكنغ لا عكس وبقوة و ماعجبني شكلة


بالنسبة للوجة :

ملمسها مخملي واذا جربتوها على يدك بتلاحظون كيف تنعم سطح البشرة وتعبي المسامات  كنت استخدمها للتي زون ( الجبهة و الانف و الدقن )
المكون الاساسي فيها السيليكا يساعد على بقاء البشرة مات بدون دهون طبعا تناااااااسب البشرات كلها لانها شفافة ما فيها ولانقطة لون بس تثبت لك الميك اب


ملاحظة : للمزيد من الامان لاتتصوري بفلاش وانتي حاطتها




ثاني بودرة استخدمتها وللاسف مدري فين راحت كانت بيج ناسية ماركتها  حتى بس اخذتها من بازار




بعدها اخذت البنانا و اللي لازلت احبها بس واجهتني مشكلة قبل فترة مشكلة معاها ومعد تقبلتها عيوني و صارت تترك زي البقعة
اتوقع كان جاف تحت عيني حتى بعد الترطيب .. بس ابشركم رجعت طبيعية اللحين و رجعت استخدمها  ملمسها خفيف وناعمة و خطوة اساسية فمكياجي و تناسب الخليجيات عموما و اذا حسيتيها صفرا بزيادة اخلطيها بلوس باودر شفافة او بيج وهذا اللي اسوية مؤخرا طبعا موجودة عن التاجرات و أون لاين وتستاهل كل ريال رخيصة وفيه احجام للاستخدام الشخصي خذو اصغر شيء حقتي اكبر وحدة و لها سنين عندي




ثالث بودرة لورا مارسييه :

عادية ما لاحظت اي اضافة لمكياجي مو بطالة ولكن اللي تعودت على البنانا او على اللون الاصفر ما بترضى بشيء ثاني فصرت اخلطهم مع بعض عشان اخلصها ممكن بعد فترة انجن فيها مدري ! موجودة طبعا فسيفورات العالم الا عندنا اخذتها من عند تاجرة



رابع بودرة واخر وحدة من nyx هالبودرة تشترك كه بودرة فوريفر بالملمس تنعم البشرة بطريقة حلوة فوتوشوب يعني بس فيها حاجة مستفزة بعدها ما تقدري تحطي بلاشر او كونتور او برونز كل شيء يتزحلق و ما يمسك فصرت احطها اخررر خطوة و استخدمتها تحت عيني بس ابدا ما حبيت ما تستاهل العنوة وانك تشترينها صراحة




وبس الاسعار للاسف ما اتذكر لكن بقول لكم وين موجودة :
فوريفر : بوتيك فوريفر - سيفورا - وجوه - فافافوم
البنانا : التاجرات والمواقع
لورا مارسييه : سيفورات العالم سيفورتنا لا ما تحصلوها - التاجرات
NYX : سنتر بوينت

اللي ابغى اجربها :
كريولان
و ماك الصفرا مرررا متحمسه لهم

وبس اكتبو لي رأيكم فالكومنت فاي وحدة جربتوها تحت