كيف تكون محاور ناجح ..

السلام عليكم ورحمة الله وبركاتة

 

عارفة مقصره بحق مدونتي كثير بس ان شاء الله ارجع احسن من اول واقدم مواضيع تفيدكم 

التدوينة اليوم ملخص لدورة حضرتها وسبق ونزلتها كتغريدات على تويتر بس حسيت لما انزلها بالمدونة افضل فجمعتها ورتبتها ونزلتها اتمنى تعجبكم 

واسيبكم مع التغريدات ..❤❤

قبل فترة حضرت محاضرة للدكتورة أميرة النمر

الله يسعدها مرا ونيسة وفلة وكانت ممتعه محاضرتها والوقت كان بيجري جري معاها😻

هيا أستاذ مساعد بجامعتنا 

وكانت المحاضرة أو (الدورة) بعنوان مهارات الحوار الفعال 

حكتب لكم اش استفدت منها بشكل مختصر مرا 

اول شي ء قالت السر بانك تنجحي بالحوار مع الناس والتفاهم معاهم انك تتبادلي الكراسي معاهم 

يعني حطي نفسك مكان اللي قدامك 

وهذا بيحل كثير من الاختلافات بالرأي 

ويدخل بضمن الكلام هذا انك ما تقدمي الا اللي ترضي انو يتقدم لك من فعل وقول

 

وبعدين اتكلمت عن مهارات التحدث وهيا ١٤ مهارة 

حذكرها كلها أن شاء الله 

١- صيغي أفكارك ذهنيا قبل أن تتحدثي 

 

يعني قبل ما تنطقي فكري بالكلام لأسباب :

عشان ما تقولي كلام مؤ مفهوم

وعشان ما تتأتأي بالكلام

 وأكيد إذا كنتي كذا بتزعجي المستمع لك

 

رقم اثنين من مهارات التحدث 

٢- خلي لغتك ممتعة وحيوية وشقية وجذابة يعني لا تتكلمي كأنك عسكري لا خليك ممتعة وتجذب الناس لك

رقم ٣ من مهارات التحدث 

خلي لغتك قريبة من لغة المخاطب 

وقصدها باللغة مؤ اللغة بمعناها الحقيقي يعني انجليزي وعربي وكذا

أكيد ما بيكون بيننا حوار الا إذا كانت لغتنا وحدة 

ضربت لنا مثال بسيط على نفسها 

قالت : كلمت وحدة بالجوال وقالت كيفك قلت الحمدلله

وقلت لها انتي كيفك وقالت ( طفشانة ) 

^الدكتورة مصرية 

تقول قلت يالهوي طفشتي فين قولي لي انتي فين وانا ارقعك ما تصلي ع النبي ارقعي

وعقبت على السالفة وقالت (طفشت) عندنا بالمصري يعني هربت من بيت أبوها أو زوجها 

وعندكم يالسعوديين زهقانة أو اشعر بالملل 😹

 

تقول هي ما قصدت توصلي الفكرة غلط وانا كمان ما كنت ابغى افهم غلط لكن لكل وحدة مرجعية ثقافية لغوية اعتمدت عليها

 

فهنا لازم يكون عندك بنك لغوي 

وكيف تجمعي لغويات ( الكلمات ) 

بالقراءة

 

رقم ٤ من مهارات التحدث 

نادي الشخص باسمه أوبأقرب واحب دلع أو كنية له 

وبيستجيب لك مثلا يا فطومة أو مثلا انا احب لما يقولون بنت طلال

٥ - 

نبرة صوتك لازم تكون مناسبة يعني مؤ عالي ومزعج ويدل على الاستبداد ولا منخفض ويدل على ضعف الشخصية لازم يكون فانخفاض وارتفاع

وقالت انو النبرة تحتل  ٣٨٪  من الحوار 

ولازم تتوافق مع مضمون الكلام يعني ما يصير تقولي كلام حلو وإنتي مكشرة وعابسة !!!؟

المهارة ٦ 

 استمعت وهي تتكلم عنها وهي : 

احرصي على فترات الصمت المعقولة في حديثك لا تسردي كلامك ورا بعض عشان ما يمل اللي يسمعك وكمان عشان تتنفسي

 وقالت انه في أنواع للسكتات 

*سكتة من فقرة لفقرة عشان يستوعب السامع و إذا كان شارد بيرجع ينتبه ويركز معاك اكثر

السكتة الثانية 

من فكرة لفكرة أو من موضوع لموضوع 

لا تسردي أفكار مختلفة ورا بعض بيتشتت ذهنك و ذهن السامع كمان ويعرف انو لما توقفتي 

اتغيرت الفكرة 

*السكتة الثالثة 

سكتة الجاذبية والتشويق هاذي اللي مدري كيف أشرحها يعني تتوقفي عند نقطة وكأنك تفكري

 

وبعدين تخليهم ببالهم يتسائلون في ايش تفكري أو ليش وقفتي أو ايش بتقولي بعد شوية 👀

وطبعا هادي السكتة بالذات لازم من بعدها تقولي كلام مهم جداً و ملفت ويخدم موضوعك 🙊

المهارة ال٧ من مهارات التحدث 

احرصي على مخارج الحروف و الألفاظ يعني 

اعطي كل حرف حقه وضحي كلمتك اللي بتقوليها

 

لا تمدمدي الكلام بطريقة تنفر السامع منك 

أبدا لا يكون ببالك انو ح يسألك عن كل كلمة ما فهمها وطبعا ما بيعديها وبيفهمها على مزاجة

عكس ما انتي تبغى ف وضحي كلامك ومخارج حروفك وتدرب على قراءة القران الكريم بتجويدوما بيكون صعب عليك اتقانة لأننا تعلمناه من ٤ ابتدائي

 

المهارة ال ٨ 

التوسط في سرعة الحديث لأنو زي ما قلت قبل شوي لو ما فهمك ما حيسالك كل شوي اش تقصدي بيبدأ يترجم دماغيا

 

التوسط في سرعة الحديث بيعني انو مجموع كلماتك تقريبا من ٢٠ إلى ٢٥ كلمة في الدقيقة الواحدة 

عشان ندي المستمع فرصة يفهم ويرتب أفكاره

المهاره ال ٩ 

إلتزمي بصلب الموضوع بمعنى لا تخرجي عن صلب الموضوع بقصة ثانية وإذا جبتي أفكار خارجية لازم تربطيها بالموضوع وتوضحين

 

هدفك من الفكرة الخارجية و طرحك لها

المهارة ال ١٠ 

ركزي على النقاط الرئيسية ونوعي في تكرارها 

حسيت هادي النقطة مفسرة للي قبلها 

بمعنى اعرضي موضوعك وكرري الشيق منها

المهارة رقم ١١ 

تحكمي في انفعالاتك واحترمي أفكاره 

يعني لا تعصبي وتندفعي

بقولكم عني شيء انا والحمد لله عندي مهارة في الإقناع

 

لكن أحيانا انفعل خصوصا لو كان الموضوع يمس التاريخ الإسلامي 

اكتشفت ضعف عندي بالتحكم بانفعالاتي وصرت اسكت الين يسكت اللي قدامي وابدأ

 

المهاره رقم ١٢ 

احرصي على انو يكون في تواصل بصري متزن 

لا تكوني سريعة بحيث انو ما تجي عينك بعينه 

ولا تطيلي النظر وتحرجين الشخص

و النظر ما يكون اكثر من ١٢ ثانية ومستوى نظرك يعني المجال اللي تطالعي فيه ومسموح لك بالنظر وما راح تربكي المستمع من الحاجب للعين

فقط ولا تنظري لشيء ثاني حتى يده عشان ما تشتتي الانتباه ولما هو يتكلم لا تبحلقي

لا ابدا تفاعلي بعيونك وايمأتك الجسدية

ولما يتحدث لك الشخص كمان لا تكوني سريعة النظر تطلي يمين تطلي شمال فوق تحت ما يصير كذا تربكيه وتخليه ينفعل ✨

 

ومعروف كثير النظر انو شخصيته مضطربة و قلقة

المهارة رقم ١٣ 

انتقي الكلمات و هذبي الألفاظ 

عاملي كل إنسان على حسب مستواه الفكري والاجتماعي 

لا تتكلمي مع أستأذنك زي صحبتك

ولا صحبتك زي أستأذنك

وأيضاً راعي الكبارفي السن 

جيلهم غير جيلك

ألفاظهم غير الفاظك بس هذا ما يمنع التواصل معهم 

ابتعدي عن صيغة الأمر

 

اسمعي

 تعالي

 وقفي

لا تروحي

 لا تسوي

 لا تفعلي 

أبدا لا تقوليها الغيها و استبدليها بألفاظ أرقى و الطف عشان تكسبي الكل

المهارة ال ١٤ و الأخيرة هي : 

خير الكلام ما قل ودل .

 

أتمنى اني أفدتكم زي ما انا استفدت اللي عجبكم لا تبخلوا فيه على اخواتكم رتويت إذا حسيتي انك استفدتي من كلامي

 

وأخيرا 

أن أصبت فمن الله وان أخطئت ف مني ومن الشيطان ❤

و لاتنسوا تصلوا على النبي 

والسلام عليكم ورحمة الله وبركاتة ❤❤