براءة .. مرح .. اجتمعت فكانت طفل 3> (( العاب للاطفال ))

السلام عليكم ورحمة الله وبركاتة :


كيفكم بنات ان شاء الله كويسين ورجعت لكم بتدوينة بسيطة اتمنى تعجبكم تعبت وانا ادور موضوع للتدوينة ..


 بما انو الاجازة بدات والفراااااغ الكبير
 اللي بيصير للاطفال سواء كانوا اولادك او اخوانك
او حيا الله قرابة مقابلينك كل يوم ..
 اول الاجازة بيكتفوا بالتي في والايباد وهالشغلات بس بعدين ننصدم بالواقع المر بيطفشوا


والصراحة .. 
 جدة جدا  حررر وكتمة وفوق هذا زحمة  وما استمتع بالخرجة
انا انسانة اكره الحر بس مو معناتة ما اطلع بس اغلب طلعاتي بتكون لاماكن مغلقة اذا بجدة
ممكن نسافر ونهيص بس اللي عندها صيفي تعرف بانها ما تقدر تتنفس
ففكرت اش ممكن اسوي العاب لاولادي تسليهم و  منها تنمي مهاراتهم العقلية وتكون بسيطة وبمتناول اليد

طبعا لازم تراعي سن الطفل من ناحية الالعاب 
انا اولادي فرق بينهم سنة بس ف احسهم متقاربين بحاول اسليهم بالاجازة وانا كمان اتسلى معاهم
جمعت كذا فكرة طبقت بعضها وبعضها ان شاء الله بيتطبق قريب طبعا ما صورت شيء من تطبيقي مرا اسفة بس حنزل التطبيقات اول باول على الانستقرام و التويتر 

اول حاجة العاب الكرتون  

طبقت منها فكرة الاشكال اللي تحت هادي ومرا استمتعوا اولادي فيها

وحاجاتها زي منتوا شايفين مرا بسيطة ورق ملون  وكرتون ولصق او حتى لو ورق عادي انا كان عندي ورق طباعة الملون وطبقت على كرتون واضفت عليه الاشكال فيسات يعني مثلا فيس زعلان فيس يضحك  واقول لبنوتي اعطيني المربع الزعلان او الدائرة اللي تضحك تخطي مرا وتطبق صح مرتين

ثاني شي بطبقة  البيت الكرتون  احس مرا بينبسطوا فيه
بسوي لسطان واحد ولجوري واحد  اذا انتي متفرغة لا تترددي تسوي لهم اشكال من قماش الجوخ والقطن لانو بيكون شيء بسيط وبنفس الوقت ممتع ومو لازم ابدا تكون الخياطة بيرفكت لانو بالنهاية هياا لعبة لاولادك واذا عجزانة عن الخياطة عليكي بالغرا المسدس ( القلو قن )

وهادي نماذج بسيطة للجوخ واللي تقدري تسويه فيه

ليش قماش الجوخ بالذات ؟؟ لاني احس التعامل فيه مرا سهل وتلاقي الوان تجنن منو بالمكتبات 

تقدري كمان تصممي ملابس زي كدا تنكريه يعني صدقيني ما بتتعبك وبيستمتعوا فيها ... 3> 

كمان هنا كم قطعة تجنن للبنات اللي يحبوا العاب المطبخ واحس انها الطف من الالعاب البلاستيك لانو احيانا تخوف مدري عندي افكار وسواسية زي انو يطيحوا عليها او شيء بعيد الشر بعيد الشر 

هنا اللعبة الحلوة تمرين حلو لعضلاتهم وتخليهم يتحركو وما يمنع تلعبيها معاهم وتسترجعي الطفولة هههههههههه

وهنا مفرش كبير مسوين لو شبابيك وباب من القماش الجميل والالوان اللي تفرح القلب وحاطينه على طاولة مرا حبيته

وهادي اللعبة الحلوة قماش كبير وسوي له شباك وجيبي الدمى هادي اللي قللك تتكلم واحكي لهم القصة اللي تعجبك اذا ما لقيتي الدمى هادي خذي شراب فززي منفوش حق البيت وقصي من قماش الجوخ اذاني و عيون وركبيها بغرا وتكلمي براحتك  >> اخص على الوصف يجيب العافية اهم شي توصل الفكرة هههههههه

هنا لعبة للاولاد كرتون على شكل سيارة الكفرات صحون بلاستيك ملونة ثبتيها بغرا او دبوس وافضل غرا وزينيها زي ما تحبي تجليد او بخاخ ملون على راحتك وخليهم يساعدوكي وانتي تسويها
الفكرة انك تخليهم يبدعوا وينبسطوا لا اكثر ولا اقل *ـ*

وهون يا حبيباتي فكرتة جميلة  من الكرتون كمان ( اعادة تدوير واستمتاع ) الانابيب حقت القصدير السفرة لا ترميها استخدميها بالشكل هذا
وللتعليم كمان خليهم يعدوا كم مسار عدت فيه السيارة كذا انتي سليتيهم وعلمتيهم
يأبرووا قلبي شو حلوين *،* 

 وهنا سوي لوحة باينه الطريقة بالصور ممكن تحطي ارقام او حيوانات زي ماهما حاطين وتساليهم اش هذا

هادي لعبة للتسلية مرا حبيتها

وهنا سيارات صغيرة ومبينه الطريقة بالصور 

وهنا مطبخ كامل من الكرتون مرا جممممممميل 

وهادي اللعبة من قماش الجوخ مقصص بطريقة جذابة نفس اللي فوق بس تغيير بالخامة 

هنا اقدر اقول ديكور للغرفة احس تنفع لعمر 6 سنوات فما فوق قصدي انهم هما يطبقوا بمساعدتك

واللحين بوريكم العاب تعليمية  اتوقع من 4 او 3 سنوات بتكون حلوة لهم

هادي بسييطة اكتبي على ورقة الحروف العربية او الانجليزية بس افضل العربي اول وقولي مثلا : لوني حرف الباء بالبرتقالي والتاء بالتفاحي وهكذا

وهدي كمان حلوة زي منتوا شايفين الاخضر مقابلو رقم 10 فتقولي للطفل حط على كل رقم 10 اخضر مو مشكلة يغلط خلي بالك وسيع لانو دوبو صغير ويتعلم

وهنا مطابقة الاحرف ببعض طبعا هنا يعلمونهم الكابيتال والسمول انتي تقدري توريهم الاحرف اللي تتشبك ببعض او مجرد حرف والحرف اللي زيه

هنا يا امهات واخوات لعبة للرياضيات مرا جميلة الاصغر والاكبر  انتي اختاري الارقام واطلبي منه يعد ويختار الاشارة المناسبة سوا اصغر ولا اكبر او العكس او خليه هو يسوي كل شيء وانتي تصححي له وتساعديه
 واعتقد انو هاللعبة بالذات مفيدة جدا للاطفال 

هنا كمان العاب التركيب كيف يكونوا كلمة
بالله مو تجنن ؟؟ 

كمان
خليهم يسووا ديكور بسيط لمكتبهم عشان يرتبوا اغراضهم فيه ...

هنا كم فكرة ديكورية هما يشتغلوا معاكي فيها وتعلقيها بغرفتهم  ومرا بينبسطوا وبتعززي الثقة في انفسهم وتحسسيهم انهم منجزين ومبدعين ومافي احلى من الطفل اللي واثق من نفسه ويعرف يقدر ذاتة ولازم احنا نقدره عشان هو يحس بقيمته ويقدر نفسه

ولا تنسوا التلوين ترا شيء ممتع لهم وبعلمهم كثير ولازم تعلمي الطفل من عمر سنتين او اقل انو يمسك القلم 

صح جدرانك بتصير سبورة بس عادي عشان تغيري البوية كل شوياا ومعاكي عذر << تتكلم بصوت واطي هههههههههه

طبعا الصورة هادي من ابداعي وما احلل احد ينقلها وحقوق الطبع محفوظة << امزح امزح عليكم بالعافية ههههههههههه

اخر صورة عجبتني وبخلي ابوهم هوا يسويها لهم اللي هيا بيت السباكين هههههههههه
سميتوا كذا لانو كلوا مواصير بس مودحين كمان شويا ابغاهم يكبروا حبتين وما ابغى اسوي لهم كل الالعاب دحين

الرجال بيعرفوا الاشكال اللي تحتاجيها وريهم الصورة وبيقولك اش تحتاجي 

وبعدين انتي سوي الجدران من قماش سهل مرا ...

الرابط حق الموضوع هذا ( بيت السباكين ) اتوقع عندي لو لقيته ححطه بتويتر ان شاء الله عشان توضح الفكرة اكثر

التدوينة هادي كانت حتكون اطول لو ما اختصرتها بس حبيت اشارككم كدا فكرة على الاجازة شيء حلو اننا نرجع نلعب اولادنا العاب زي كذا لانو احس الجيل هذا يا تي في يا ايباد وايبود والحاجات هادي

انا اولادي عندهم ايبود بس مو دايم معاهم وبنوتي ما قصرت كسرته افتكينا منه ف  العبهم بالالعاب التركيب وكذا كمان العبهم كم لعبة قديمة كانت جدتي تلعبنا هيا
انا من قبائل الحجاز اللي من نفس قبيلتي ممكن تعرفها وهيا ( حدارجي مدارجي ) و (ويس يا ويس ) 
و اولادي مرا يحبوها ويرددونها كثير ف لما نجلس بمجلس ويغنوها يقولوا الناس يووووه قديمممه
بس عادي مبسوطة انا واولادي فيها 
هههههههههههههههه ويعجبوني لما يغنوها 
ولاتنسي تخليهم يحفظوا سور صغيرة من القران اذا كانت عندهم القدرة على الحفظ ..


واخيرا ... 
اقول لا تخلي مشاغل  الحياة تاخذ منك اجمل سنين بعمر اطفالك استمتعي بكل لحظة معاهم خليكي قريبة منهم حسسيهم بحنانك 
صحيح انه احيانا تكون اشياء خارجة عن ارادتنا دراسة وعمل وبيت ومسؤولية بس ضروري ما تنسي الشيء الجميل بحياتك وهما ..  الاطفال  .. 
ابتسامتهم كفيلة بانها تريحك وتهديك وزعلهم مرا يجنن 

واسال الله ان يرزق كل محروم بعشرة اطفال يملوا عليه دنيته ..
والحمدلله على النعمة الجميلة هادي ومنجد زينة الحياة الاطفال .. 
شكلي  هرجت كثير اتمنى اني وصلت لكم افكاري واذا اعجبتكم التدوينة لا تبخلوا على بالرتويت ولاتنسوا تشتركوا بمدونتي عن طريق الانضمام للموقع 
تابعوني بتويتر و الانستقرام 
وبس لا تنسوا تصلوا على النبي عليه الصلاة والسلام 
والسلام عليكم ورحمة الله وبركاتة