رأي في منتجات مكياجي ( مجموعة العيون الحساسة + روج صبايا + مسكرا منكس )

السلام عليكم ورحمة الله وبركاتة

كيفكم بنات ان شاء الله كويسين
اذا لسا تتذكروا قبل فترة مكياجي رسلوا لي مجموعة من عندهم عشان اجربها واقولكم رأي فيها
اذا تبغوا تشوفوا التدوينة اللي قبل اضغطوا هنا
طبعا ما شاء الله عليهم رسلوا مجموعة كبيرة وما اقدر انزل تجربتي ببوست واحد كالعادة حقسمهم على عدد من التدوينات
حتكلم اليوم عن مجموعة العيون الحساسة

اول حاجة المسكرا ..
الصراحة عادية وما شفت فيها شي مميز كثافة متوسطة و ما تطول الرموش ( انا رموشي متوسطة بالطول والكثافة بس تفرق معي المسكرا يعني نتيجة ميبلين افضل )
 هاذي فرشتها ..

ثاني حاجة الاي لاينر ( المحدد السائل )
جميل جميل جميل سواده خطير وثباته روعه لكن في مشكلة صغيرة احس ما ينشف بسرعة لكن سواده يشفع له

ريشته حلوة مو قاسية زي الاي لاينر تبع ريميل و شبيهه لايلانير لوريال بس فالسواد فرق السماء عن الارض المهم حبيته مرا
السواتش اللي بالوسط هوا الاي لاينر و اللي بجنبة الكحل

اخر شي بالمجموعة قلم الكحل وسواتشة بالصورة اللي فوق
جميل ناعم على العين وبسرعة يمشي اكحل به تحت الرمش العلوي ما يعورني ابدا وبسرعة يبين
ارجع اخذة ؟؟
ما اعتقد بس يمكن عشان الاي لاينر ارجع اخذه :)




ثالث شيء المسكرا من  مجموعة منكس

حبيتها استخدمها مع عكافة الرموش من اتش ام ولا احلى واستخدمها هي ومسكرا افون كل يوم الصباح احسها تكثف الرموش



بالنسبة  لمجموعة الفرنش تيبس عجبتني المناكير جميلة وتكلمت عنها قبل كم يوم (  هنا  )لكن ما حبيت المبرد ما حسيت انو يبرد مزبوط
و المناكير الابيض شويا قوامه ثقيل بس اريح بمليون مرا وارخص من الصالونات

اخر شيء الروج كلمتين بس لونة روعة  مشمشي على لحمي مو عارفة اقرب لكم اللون بس شوفوه بمحلاتهم رقمه 01
انا من الناس اللي تاكل الروج فما داري عن ثباته وانا احطه مع روج ثاني وقمة بالجمال كمان سعره ما ادري والله



واخيرا وصلنا لنهاية التدوينة طبعا اعطيتكم رأي المزبوط ما رفعت منتج اكثر من ما يستاهل وكمان احتمال اللي يناسبني ما يناسبك فروحي لاقرب فرع مكياجي وجربي و خيره كمان كلهم بنات بيشتغلوا هناك فتقدري تجربي براحتك
وقولوا لي رايكم اذا جربتوا منها شيء

ولا تنسوا تصلوا على النبي
والسلام عليكم ورحمة الله وبركاتة