طريقتي بالسلطة الحلوة + الحمص

السلام عليكم ورحمة الله وبركاتة
اليوم التدوينة عن عشاء اهلي الي نزلته قريب
كثير سالوني عن الطريقة وكذا و قلت اللي بيجيني عليها طلب كثير بكتب تدوينة عنها
ف  بنات كلموني بتويتر وبنات على الايميل
واليوم اربعاء وفيه طاقة اني انزل تدوينة وان شاء الله ما اكون تاخرت
 انا حكتب ان شاء الله عن كل طبق >> على فترات متباعدة عشان وقتي ضيق مابين دراسة وتدوين واطفال وبيت وانا << اهم شيء

واللي حابة تشوف الجزء الاول تنط تشوفة هنا



http://www.ab00la.blogspot.com/2013/04/blog-post.html



اول شيء السلطة الحلوة اللي كثير بنات تحمسوا لها اش اللي خلاني اسويها ؟؟
انا كنت احب اشتري سلطة الملفوف من البيك بس مرا حسيت انها خربانة او قديمة مرا وتغير طعمها << ويمكن كنت اتوحم ههههههههه
 المهم كرهتها من عندهم وقلت بسويها بالبيت وللامانة المطبخية هههههههه طلعت اطعم بمليون مرا  ...

نجي للمقادير :
جزر
خس ( هو اصلا ملفوف بس انا حبيتها مع الخس اكثر )
زبادي
مايونيز ( لكل علبة زبادي ملعقة الى ملعقتبن من المايونيز وكثري اذا ما يضايقك طعمه )
عصرة ليمون
شوية شوية ملح تقريبا على راس ملعقة الشاهي
والمكون الاساس طبعا السكر ( وكمان على حسب الحلاوة اللي تبغيها انا احط ملعقة اكل  )


الطريقة :
يمكن في ناس ما يحبون الطعم هذا اللي هو حموضة مع حلاوة انا كمان ما احبة بس مع السلطة هادي حبيته وادمنته
اول شيء تجيبي الزبادي ( وهو مقفل قبل ما تفتحيه رجيه تقريبا نص دقيقة وحيجي قوامه سائل مو زي اللبن لا  اثقل  )
 والمايونيز والليمون والملح والسكر وتحطيها مع بعض وتخلطي  واحرصي انو السكر كلو يذوب وذوقي واوزني الطعم زي ما تحبي
وبعدين ابشري الجزر والخس قطعيه  مو فرم ناعم تقطيع خشن
وفي حالتي انا سويتها من الليل عشان الطعم يجي مزبوط بس اهم شيء الثلاجة تكون باردة وتكون السلطة متغطيه كويس لانو مايونيز وممكن يخرب و استمتعي بالطعم ..

الحمص  ........ عشقي الابدي مستحيل ومستحيل ومن سابع المستحيلات اروح مطعم ويكون عندو حمص وما اخذ
 والذ حمص .. !!  حمص البيك فيه حموضة مو صاحية احبها مرا
طبعا ما يصير كذا تروح فلوسي عند البيك يختي ما ينفع لازم اتعلم اسوي زيهم حامض و فكرت وخبصت كثير ما زبط معايا الا لما عرفت سرهم واللي اتوقعه ملح الليمون
وحمصي صار حامض زي حمصهم اول كنت اسوية بس بالعصير وما يزبط كذا
طبعا اموت لو ما هرجت كثير اتحملوني عاد ههههههههههههههه


مقاديرة
حمص معلب ( هذا الصحن علبة ونص كبيرة حمص  وخلي شوية للتزيين )
عصير ليمون
زيت زيتون ( نص فنجان تقريبا )
ملح
كمون + سماق ( للتزيين )
زبادي ( يمكن علبة او علبتين ازيد ما عندي مشكلة )
موية ( فنجان قهوة يكفي )



الطريقة :
اغسلي الحمص بملح وموية كويس عشان تروح الريحة ( احس كل المعلب فيه ريحة )
وبعدين جيبي الخلاط وحطي الزبادي والليمون والملح  وفنجان الموية   بدون زيت زيتون

واذا حسيتي انو ثقيل وما بينخلط اضيفي زبادي شوية وشوية ليمون عشان توازني الطعم لا تحطي موية اكثر من كذا خففيه بالزبادي والليمون عشان يكون اطعم وعلى اخر خلطة حطي زيت الزيتون  

وسر الحمص الناجح انو يرتاح اقل شيء من ساعة الى ساعتين في الثلاجة  واذا اكثر ما نكره ويكون احسن 

طبعا هذا اللي قدرت اكتبة اليوم اتمنيت اني اصور لكم الخطوات بس  وقتي ما يساعد لكن اتمنى وصلت لكم الفكرة 

تابعوني على تويتر @ab00la

واذا حابين تسالوني على الاسك تفضلوا  ask me

واخيرا لا تنسوا تصلوا على النبي 

والسلام عليكم ورحمة الله وبركاتة ....