طريقة السينابون السهلة جدا

السلام عليكم ورحمة الله وبركاتة .. وعدنا بعد انقطاع طويل عن قسم مطبخي ..

اليوم بقولكم عن طريقة جميلة تعلمتها بعد تجارب كثيرة  و سهلة جدا والعجينة تطلع معاك طرية .. والطبخ والوصفات مو قرآن منزل ما تقدري تعدلي وتغيري فيه وتضيفي لمستك

المقادير :

العجينة :
كاسة حليب دافية - او 4 ملاعق حليب بودرة في كاسة ماء
بيضتين
زبدة اصباع 60 غرام فالصورة الزبدة اللي احتاجها فالوصفة كاملة
خميرة ملعقة طعام
ملعقة صغيرة باكنج باودر
سكر ثلث كوب
نص ملعقة ملح
3 كاسات  ونص دقيق .. نفس الكاسة اللي فيها الحليب وممكن تزيدي شوي اذا حسيتي انو لسا ما تماسكت العجينة


الحشوة :

• قرفة
• سكر بني << ممكن تستبدليه بسكر عادي وتحطي ملعقة صغيرة دبس تمر او بدون دبس اذا تحبي
•  زبدة 100 غرام

** انا خلطت سكر عادي ناعم  مع دبس تمر مع قرفة وكمان تقدري تطحني السكر يصير بودرة
بس انا بحبه يأرش تحت الضرس هههههههههه




صوص الكريم تشيز : 

جبنة كيري 6 قطع ممكن تستبدلي الكيري بجبنة فيلادلفيا
زبدة نص  اصباع
سكر بودرة
اذا حابة فانيلا سائلة
وملعقة قشطة
و بيدك بالخفاقة او مضرب الشبك او فالخلاط

** وهذا اللي انا سويته

او

كيري 6 قطع
وحليب المركز المحلى
و بالخفاقة او فالخلاط




الطريقة :

حطي الخميرة مع الحليب الدافي اولا وحركيه شوي وبعدين حطي  المكونات السائلة مع بعض ( حليب بيض زبدة ) في صحن العجن اخلطيها مع بعض وبعدين اضيفي السكر والملح وابدأي اضيفي الدقيق واعجني لمدة خمس الى سبعة دقايق وخلي العجينة ترتاح لمدة نص ساعة او ربع ساعة لحد ما تتخمر وتنفش .. 

بعدها اخلطي السكر والقرفة في صحن وخليها على جنب 

لما تخمر ابدأي افرديها على سطح مغطى بالدقيق وافرديها اللين تقريبا يصير ارتفاعها مناسب  لا تخليها عريضة مرا و يصير تاكلي عجينة ولا تخليها مرا نحيفة ما تقدري تلفيها ههههههه

وادهنيها بالزبدة بكرم واتركي مسافة لا تحطي زبدة عشان تقفليها

 وحطي خليط القرفة والسكر  وخليكي كريمة

واتركي مساحة كمان اللي ما حطيتي فيها زبدة اول

ولفيها كويس بس خلي لفتك صغيرة فالبداية يعني تقريبا 1 سم

و قطعيها وخلي حجم القطعة تقريبا 7 او 6  سم  عشان تجي مليانة كأنها سندوتش ههههههههه

و امسسحي صينية بالزبدة
ولما تجي تحطي القطع حاولي تلميها من تحت شوي ومن فوق افتحيها  و رتبي القطع جنب بعض عشان تجي طرية كلهاا (( وحدة من متابعاتي اعطتني الخطوة هاذي يسعدها ربي )) وبرضو خليها ترتاح ربع ساعة او نص ساعة

وبعدين دخليها للفرن على درجة حرارة 200 لمدة 15 الى 20 دقيقة 

واول ما تطلعيها حطي عليها خلطة الكريم تشيز 

وفنجال قهوة وبالعافية .. وروني تطبيقاتكم فأي مكان من اماكن تواصل الاجتماعي هههههههه 

ملاحظة شديدة اللهجة : لا تجي وحدة تقول مليانة زبدة ثقيلة هذا حلا كوليه عدل ولا لا تاكليه ههههههه وبعدين قطعه صغيرة ما بتمتنك 

لا تنسوا تصلوا على النبي والسلام عليكم ورحمة الله وبركاتة