روتيني بالفاونديشين

السلام عليكم ورحمة الله وبركاتة .. كيفكم بنات ان شاء الله كويسين ومبسوطين وتدوينة اليوم خيرتكم فيها و كان الانتصار باكتساح
لروتيني بالفاونديشن طريقتي يعني ..

كيف احطة واش المنتجات اللي استخدمها و اكيد بتتخللها ريفيوات صغيرة عن كل منتج واللي بتذكر سعره حقولكم عليه ..
لذا جيبوا كاسة قهوة وتعالوا ندردش .. طبعا مو ثابته على هالروتين وانوع احيانا فاشياء بسيطة
.
.
طريقة الفاونديشن تعتمد على حسب وضع بشرتك وانتي اش تحبي انا احب يكون الفاونديشن حقي فل كفر ومات خصوصا للسهرات
وهذا الروتين اللي بعرضه عليكم ما احطه الا بالمناسبات المهمه و الكبيرة ايفنت او زواجات ..


مشاكل بشرتي :
مرا مدلعة احيانا جافة بالخدود و دهنية بمنطقة الدقن و الجبهه و الانف .. واحيانا لا دهنية جدا بكل مكان حتى خدودي .. و أنا اشوف بشرتي قبل احط الاساس اش وضعها اليوم واحدد الاشياء اللي حستخدمها و الطريقة اللي بتبعها ممكن انقص شيء او ازيد حاجة
، وعندي كمان اثار حبوب قديمة بخدودي



الخطوات :
اول شيء ابدأ على بشرة نظيفة دوبني مغسلتها بالغسول حقي و اوزع المرطب اللي مخصصته لقبل المكياج وهو توتال موسترايزر
من بنفت اثق فيه جدا كمرطب قبل المكياج و ايضا استخدم من عندهم مرطب للعيون ونسيت اصوره .. احس انهم ما بيخذلوني لقبل
المكياج لأنهم من شركة ميك اب .. اكيد التركيبة بتكون مناسبة كبيس قبل المكياج ، لان بعض الكريمات خصوصا العيون ممكن تخطط زيادة او ما تتشربها البشرة بسرعة . . واللي بالصورة عينة مو الكريم الاساسي و احسو كثير ما شاء الله فيه البركة

وبعد ما اوزع المرطب استنى البشرة تتشربه و ابدأ احط برايمر العيون  واشتغل على الشدو و أنا عادة احب ابدأ بعيوني اذا كان اللوك ثقيل او الوانه غامقة اما اذا بسيطة اخليه بعد ما أخلص الاساس  البرايمر اللي استخدمه هالفترة و سويت عنه ريفيو هنا

برايمر اول ان ون اخذ تقريبا شيء خفيف واوزعه على التي زون ( الانف - الجبهه - الذقن ) و اذا خدودي دهنية احطه كمان على خدودي و اخلي يمتزج مع البشرة و ذحين ابدأ احط الاساس ميك اب فور ايفر اتش دي  وكتبت ريفيو مبسط عنه بتدوينة مشترياتي هنا  عن سعره وكل حاجة  .. ناوية اغيره مو لشيء  لكن ابغى اجرب انواع ثانية .. و جاي على بالي مارك جيكوبز و جورجيو ارماني واستي لودر دبل وير اذا جربتي شيء منه قولي لي

الشيء الصغير اللي جنبة احطه لما اكون حابة يكون اللوك ديوي او فيه لمعه مائية مو قليتر يعني ، فاخلط نقطة صغيرة مع الاساس
اسمو قيرل ميتس بيرل من بنفت وكمان هذا عينة .. يعتبر لمعه سائلة للوجه يعطي قلو واشراقة للوجة جميل مسغربة انو ما في احد يتكلم عنه


وبعد الاساس ابدأ أوزع وادمج الاساس بالبيوتي بليندر وهي جافة اذا بشرتي مرا دهنية واذا بشرتي عادية و هي مبلوله


و بعد ما خلصت من الاساس احط الكوركتر للهالات السوداء والكوركتر حقي روج من مكياجي يأدي الغرض لحد ما الاقي كوركتر
تركيبته تقنعني
.. اللي ما عندها هالات غامقة ما تحتاج الكوركتر

وقبله احط مسحه خفيفة من برايمر بنفت ستي دونت ستراي (( اللي بالصورة عينة كمان ))  قريب من الرموش السفلية يثبت لي الكوركتر وما يخليه يختفي اطبطب عليه و احط الكوركتر ولازم اللون يكون واضح اورنج مو مدموج وما تلاحظيه ..

الكونسيلر للي عندها هالات مصيبة صغيرة ممكن تنسي خطوة او تكثري كونسيلر ويخطط او يعطي منظر كيكي استعجل بكل شيء الا الكونسيلر اعطيه وقتي كله و احيانا اكثر بودرة ويصير كيكي ويخطط .. هو الوحيد اللي مزاجي يحكمه هههههههه اذا رايقة يكون جميل واذا لا !! لاحول ولا قوة الا بالله خخخخخخ


وبعدها احط كونسيلر بنفس لوني عشان اخفي الهالات بعد الكوركتر استخدم اللحين فل كفرج من ميك اب فور ايفر درجة 8 وللاضاءة استخدم كونسيلر ماك برو لونغ وير ان سي 30 << هذا مؤخرا صرت استخدمة كنت استخدم فيت مي درجة 10

و الاثنين حابتهم مرا ..
وكل شيء يندمج بطبطبة وبخفة  بالحب البيوتي بلندر .. اللي لازم تكون عندكم

ولان اساسي فل كفر فما احتاج ارجع احط كونسيلر على وجهي يجي اللحين دور التثبيت بالبودرة البنانا باودر بفرشة الستينغ برش من ريل تكنيك مرا احبها هالفرشة

 او البودرة الشفافة من ميك اب فور ايفر  واذا رايقة دمجت بينها وكلها حلوة بس البنانا احلى لانها تضمن لك ان الكونسيلر ما يقلب رمادي

واخيرا اوزع البرونز والبلشر.. ما صورتها لاني اغير وعندي كذا ماركة وما اتقيد بوحدة معينة اما  الهايلايتر فغالبا ماري لومنايزر ونادرا احط شيء ثاني

اخيرا ححط لكم كم تدوينة سويتها زمان و ان شاء الله تفيدكم وتعجبكم .. ان شاء الخطوات تكون واضحة

كيف اسوي مكياج العيد .. (1) الاساس - الهالات السوداء ( الكونسيلر )

كيف اسوي مكياج العيد .. (2) الحواجب - الكونتور والهايلايتر

كيف اسوي مكياج العيد .. (3) مكياج العيون - الروج


وبس كذا وصلنا لنهاية التدوينة اتمنى انها عجبتكم و لا تحرموني من التعليقات الجميلة زيكم وتجاربكم للمنتجات  سواء كنتوا موفقين فيها او كانت كارثة ههههههه  ولا تنسوا تصلوا على النبي و السلام عليكم ورحمة الله وبركاته