تشيز كيك اللوتس

السلام عليكم ورحمة الله وبركاتة  ..
و اليوم تدوينتنا حتكون فقسم مطبخي وصفتنا حتكون حلى .. تشيز كيك اللوتس

اللوتس اكثر شيء فالحياة  شدني اجربه من الصجة والرجة اللي صارت عليه قلت بس هذا الحلى اللي بيغير حياتي هههههههههه
المهم وقدر الله وتحمست اسويه تشيز كيك .. وبدأمشوار البحث عن زبدة اللوتس وما حصلتها بس لقيت لها بديل حتشوفوه بالصور تحت ..

نكهة اللوتس ممكن تسويها باي وصفة تحبيها مثلا تارت اللوتس او رايس بودنغ باللوتس وهكذا

نبدأ يلا بالمقادير :

طبقة البسكوت :
دايجستف نص العلبة
لوتس نص الكمية الموجودة
وزبدة
وزبدة البسكوت او زبدة اللوتس

التشيز :
10 جبنة كيري
نص علبة قشطة
ظرفين دريم ويب
سكر حسب الرغبة انا ما حبيته يكون حالي مرا فاضفت تقريبا 3 ملاعق صغيرة  سكر بودرة
عصره ليمون
ربع زبده

الطبقة الاخيرة
زبدة اللوتس او زبدة البسكوت ثلاث ملاعق
قشطة نص العلبة الباقية تقريبا ملعقتين
الزينة لوتس مطحون





الطريقة :

طبعا التشيز كيك اللي حسويه هو البارد اللي ما يحتاج طبخ انتي لو حابة النوع  الثاني اللي بالطبخ سويها و بس الطبقة الاخيرة بدليها بصوص اللوتس .. وتقدري تعرضي من حجم التشيز كيك بانك تضاعفي الكمية بس بالنسبة ليا حسيتو ثقيل ويكتم لو كانت طبقاته اكبر 

وزي ما قلت لكم الطبخ مو قرآن منزل تقدري تغيري فالوصفة اللين بس 

نبدأ 

طبعا اول طبقة البسكوت انا خلطت دايجستف مع اللوتس بس لو حابة تخليها كلها لوتس مو مشكلة والطعم بيجي اقوى واوضح وتحطي معاها ملعقتين زيدة البسكوت و ملعقة زبدة عادية وممكن تزيدي  اللين يتماسك لا تكثري مرا عشان ما تجي قاسية الطبقة اللي تحت لانو يتقدم تقريبا مثلج فلو كثرتي زبدة بيصير تقطيعه صعب .. فصينية التشيز كيك اللي تنفك  او اي صينية انا دهنتها بزبدة  واضغطيه  بقاعة كاسة وساوي سطحه .. وحطيها بالفريزر خليه يتماسك اكثر 

 

واللحين جا دور الطبقة الثانية اللي هيا الجبنة اخلطي كل المقادير مع بعض فالخلاط  وحطيها على البسكوت ودخليها الثلاجة اقل شيء ٤ ساعات واذا اكثر احسن 

                                      

والطبقة الاخيرة صوص اللوتس ؛  زبدة اللوتس مع قشطة والحلو ان زبدة اللوتس مو ناعمة فمرا حسيت احلى من انها تكون ناعمة 

وللتزيين لوتس مطحون وقطعة بسكوت فوق وخلصنا 

وبس زي ما قلت لكم كل ما خليتيها فالثلاجة كل ما كانت الذ واقل شيء 4 ساعات فالفريزر  كان نفسي اقطعها واصورها لكن اخذتها معايا لبيت عمتي 

• زبدة البسكوت و بسكوت اللوتس من الدانوب 

وبس والله ان شاء الله تعجبكم وتجربوها ولاتنسوا تسوو لي تاق على تطبيقاتكم .. لاتنسوا تصلوا على النبي والسلام عليكم ورحمة الله وبركاتة