تصفيف الشعر ..

السلام عليكم ورحمة الله وبركاتة
كيفكم بنات .. ان شاء الله كويسين ؟؟
اليوم التدوينة حتكون جميلة وبسيطة وان شاء الله تستمتعوا فيها حعرض فيها اشيائي اللي استخدمها لشعري .. وكيف اصفف شعري بحرارة وبدون حرارة
اول شيء نوعية شعري شعرتي رقيقة بس كيرلي يعني الحمدلله يارب اذا بسوي كيرلي يصير واذا استشورته بيجيك احساس انو شعري اساسا ناعم .. طبعا تعبت لحد ما عرفت لو مو ناحية الاستشوار والتمليس لا من ناحية كيف اخلي الكيرلي مرتبة وحلوة
اول شيءبقولكم وش استخدم شامبو .. ويمكن ابدا ما يناسبكم لكن انا احبة ينظف شعري من قلب ويعطيه لمعه حلوة جربت غيرة من السوبر ماركت  لكن ما في زيه شعري مرتاح عليه الحمدلله وسعره كويس ولانه شامبو بصفة مستمرة استخدمه لازم سعره يكون مناسب ميزانيتي ممكن الماسكات اخذ غالي بس الشامبو ما حأقدر كل شهر اجيبة بالسعر الفلاني .. فراعي ميزانيتك وانتي تاخذي اشياء عنايتك .. لانو لو غالي ما بتقدري توفريه كل شوي

استخدم بانتين امتزاج الطبيعة او انسيابي وحريري والبلسم اللي تجي معاهم بس غالبا اكتفي بالشامبو
وريحة امتزاج الطبيعة تهبل اعرف انو مو شيء كويس ريحة العطور تكون قوية وكذا بس بصراحة لازم الشامبو حقي يكون فيه ريحة عشان نفسيتي تكون راضية ههههههههه || بس لا تخافوا ما تثبت ريحتة مرا وتغطي على عطر شعرك

اما الماسكات استخدمت تقريبا كل اللي بالسوبر ماركت لكن اكثر شيء عجبني غارنير فروكتيس اللي بالصورة ويعطيك الترطيب في دقيقة و فعلا جميل وريحته تهبل سعره يمكن 20 او 30 ناسية

واجمل واجمل منو المكاديميا ريحتة تهبل ومفعولة بطل وحلو سعره 105

التصفيف من غير حرارة .. 
المكاديميا استخدمه انا وبنتي لحاجة في نفسنا (( للامانة ما جربته بالماسكات الثانية بس مو شرط جربية باللي عندك )))
 اذا بخلي شعري وشعرها بدون تصفيف او ماخذ راحته اغسلة بموية بس واحط الماسك ولازم شعرك قبلها بيوم اساسا يكون نظيف ومغسلته بشامو
بعد ما اخرج من الحمام امشطو على طول لا تقولوا مبلول وما يتمشط ومدري ايش ويضر الشعر اذا شعرك كيرلي ابدا لا تمشطية وهو جاف لانو بتنفك الخصل وبيجي مو مرتب  خذي مشط اسنانة كبيرة ومشطية وهو مبلول او فرشة من اي مكان تلاقيها وتكون خشب افضل
اذا ابغى كيرلي زي مريام يعني بلفات صغيرة اسيبه براحته ما المه واذا ابغاه يكون ويفي ناعم اظفره على جنب الظفيرة العادية
ونفس الشيء لبنوتتي حيجي من فوق مرتب وناعم ومن تحت فيه تكسيرة حلوة

طبعا طبعا طبعا اللي ناسبني ممكن ما يناسبك فجربي الطريقة وانتي بالبيت مو خسرانة شي 

انا انسانة بسيطة ما احب اعقد نفسي بحاجات كثيرة وما اسوي شيء منها فاكتفي بماسك وشامبو وبلسم هو غلط ولازم تعتني بس كل فترة وفترة اسوي لي حاجة بسيطة بالبيت ليا ولبنتي وغالبا اللي اسويه ماسك مغذي ((بيض - مايونيز - زيت زيتون - زبادي )) يعطيني ترطيب ويغذي شعري وشعر اميرتي الصغيرة ..


نجي للتصفيف بالحرارة .. 

اول شي الاستشوار .. نوع استشواري الماني .. مناسب نوعية شعري وجربته على شعر غير شعري وكان مرا كويس
الحمدلله ..
اضيفي الى ذلك فرشة كويسة و كلبسات للشعر ومشط لتقسيم شعرك ولو اني اعتمد على اظافيري بالتقسيم اكثر شيء هههههههههههه
سعره تقريبا 120

الفرشة .. 

فيه كذا نوع بس اشهرها الفرشة الخشب والفرشة الثانية اللي اساسها معدن
انا افضل الخشب زي حقتي اللي فوق  لانو المعدن مؤذية اكثر للشعر كمان ممكن تلسعك اللين تبلعي العافية  << استخدمتها مرتين ورميتها وتبت ما عاد اشتريتها

مقاساتها ..

انا اشوف ومن تجربتي اذا شعرك قصير تاخذي فرشة متوسطة لا تاخذي كبيرة عشان تقدري تتحكمي بشعرك اكثر ولو شعرك طويل اسرع وافضل تكون الفرشة اكبر شوي بتسهل عليك الاستشوار وتختصر الوقت

اول وحدة كويسة للي عندها بيبي هير بمقدمة شعرها بتساعدك تتحكمي فيه وتستشوريه بس مو لاستشوار الشعر كلة بتطلع عينك
وبعدين المقاسات المعتادة انتي اختاري اللي تحسي انك تقدري تتحكمي فيه  بالاضافة انها تكون مريحة بيدك
من تجربتي اللي تكون يدها مطاط او سيلكون تلصق بيدي بشكل مزعج فتتعب كفي
اما اللي خشب تنزلق بسهولة لما ابغى ابرمها
كمان اللي تكون يدها عريضة تتعبني ما اخلص الا يدي متشنجه .. اما زي فرشتي اللي فوق بالعكس مريحة ليدي
وكمان لا تختاري وحدة مسكتها صغيرة لانها بتتعبك بالمسكه يعني خليك وسط والتجرررربة خير برهان بتعرفي اش اللي يناسبك

شعر الفرشة 

مين مننا ما مرت بفرشة تذوب شعراتها وتكون جودتها رديئة  .. احيانا يكون الغلط منك بانك تطولي وانتي موجهه الاستشوار على شعراتها فتذوب واحيانا هي اساسها رديء روحي نزية ونقي فرشة شعراتها تكون كثيرة






اسرار نجاح الاستشوار .. 

• استشوار نوعية جيدة 
• شعرك يكون نظيف 
• اذا كان دهني لا تستنيه ينشف من حالة عشان تستشورية .. استشوريه على طول 
• قسمي شعرك اذا كان قليل اقل شيء الى 4 اقسام  اذا كنتي مبتدئة وقسمي كل قسم الى اقسام عشان تضمني ان كل شعرك تصفف كويس 
• استخدمي فرشة تكون مريحة باليد 
• وانتي تشتشوري لا تشدي الشعر بطريقة مستقيمة غلط لا حاولي اذا وصلتي الطرف تلفي الفرشة وترجعي من جديد لفوق عشان ما يجي الشعر واقف من الاطراف 
• خلي الاستشوار قريب من الفرشة لا تبعديه عشان تكون النتيجة كويسة وناعمه 

عشان تشوفي مقطع فيديو للطريقة اكتبي باليوتيوب hair blow drying وان شاء الله تستفيدي
اهم شيء ركزي على مسكة الفرشة والاستشوار وكيف يسحبوا الفرشة ويلفوها بالاخير وحبة حبة لحد ما تتقنيه ان شاء الله

طريقتي .. 

اقسم شعري على حسب مزاجي صراحة اذا مثلا  للجامعة فيكون تجفيف اكثر من انو تصفيف لاني حلمو ما بخليه فاقسمة لثلاثة اجزاء واجفف واستشور على السريع  واذا لسهره او زيارة لناس لا اقسمه اقسام صغيرة ابدأ ب 4 اقسام واقسم هالقسم لخصل
لازم تنتبهي لجذور الشعر لانو من الجذور يبين استشوارك مزبوط ولا لا

شيء ثاني احرصي انك تستشوري نفس الخصلة من فوق وتحت
و لما توصلي للاطراف عيدي عليها وانتي تبرمي الفرشة يارب تكون وصلت الفكرة مو تسحبيها بشكل مستقيم مرا غلط بتبين شعرك تالف و كانو محروق من الاطراف

ولما توصلي للاطراف مرا حطي الفرشة تحت والاستشوار فوق ولفي الخصلة لجوا  ومرا اعكسي الفرشة فوق والاستشوار تحت وابرمي لبرا  كل هذا وانتي تبرمي الفرشة  <<< ضروري تبرمي

 ابرمي الفرشة .. 

^^ حنجلد من كثر ما قلت ابرمي الفرشة لكن للاهمية ابرمي الفرشة .. وجبت العلقة ههههههههههههههه

لا تخافوا ما حيجي استشوار على برا لانك بتبرمي على برا وعلى جوا .. 

المملس او الكاويه او الستريتنر .. 

اول شيء لا تستخدمية الا اذا كنتي مضطرة و مافي الا هو لانو لاحظت انو مؤذي اكثر من اي شيء ثاني قبل فترة قصيت قصة فكتوريا بيكهام بس اطول طبعا و اللي بتجي من قدام طويلة شوي ومن ورا قصيرة 

واحتجت شيء يخليه من قدام جاي ستريت رحت اشتريتها كنت ابغى حق براون اللي كسر الدنيا وانو يحمي ومدري ايش المهم ماحصلته واخذت من بيبي ليس يمكن سعره 100 وشيء 

كيف استخدمه .. 

• لازم شعرك يكون نظيف 
• لازم شعرك يكون جاف تماما مافي نقطة موية ولا بيموت الشعرة .. اتكلم من جدي 
• استخدمي واقي من الحراري .. ضروري ضروري اذا تحبي شعرك 
• بعد ما تخلصي حطي سيروم عشان يعطيك لمعة 

تجربتي .. 

انا احب شعري يكون طبيعي اكثر ف ما اعطاني النتيجة هاذي .. اضيفي الى ذلك يسبب جفاف حتى مع كل اساليب الوقاية
.. ممكن تستخدمية من فترة لفترة ..  وبعد ما تستخدمية احرصي انك تغذي شعرك بماسك ..
صراحة ما حبيتة بس ليه لسا عندي لتسريحات معينة واحاول اتحاشاه قد ما اقدر ..

تقدري ترفعي الحرارة وتوطيها على حسب شعرك واستجابته ..

طريقة استخدامة سهله مشطي شعرك وشيلي اي عقد بشعرك ومشيه و جبت صورة لحركة حلوة فيه هو له استخدامات كثيرة بس انا غاضة الطرف عنه
ممكن لو  لقيت حق براون اشترية واستخدمة

الفير .. 

طبعا هذا عشقي الجديد .. بعد الاستشوار طريقة استخادمه سهله وتلاقوا فيديوهات كثيرة باليوتيوب
تبعي من جوسي ايبر ينفع تستخدمية وشعرك جاف نسبيا و جاف تماما الافضل استخدميه وشعرك جاف تماما
سعره ب 350 ريال

اذا كنت ابغى شيء طبيعي اسوية بدون استشوار لانو شعرتي اساسا ناعمه بس المناسبات لازم استشوار تحسبا لاي ظرف
لفي الخصلة وعدي من واحد الى 20 وممكن اقل برضو على حسب نوعية شعرك

طريقة للفك للخصلة بتطلع لك نتيجة مختلفة

عشان تعرفي الطريقة افضل اكتبي باليوتيوب 

wavy hair

اخر شيء منتجات استخدمها .. 

من اليمين ..

• تريسمي واقي حرارة قبل اسوي الفير او الستريتنر او الاستشوار من عند تاجرة 
• رغوة مكثفة من ويلا اذا ابغى الويفي تطول كمية بسيطة بس بالعشرين ريال 
• بخاخ مكثف من ويلا بعد ما اخلص فير بالعشرين كمان مو اكثر 
• سيروم للشعر من لوريال وعندي كمان من افون وكمان كريستال .. 

احطها بعد ما اخلص اخر خطوة عشان اعطي شعري لمعة سوا بعد الاستشوار
 او الفير او الستريتنر 

طريقتي بتعطير شعري .. 

استخدم اي خمرية واي عطر زيتي الاقية وتعجبني ريحته 
 للجامعة استخدم العطر الزيتي من بودي شوب بالياسمين احبة ريحتة ريحة نظافة 
والثلاثة الباقية من الاكشاك حقت العطور بكل سوق نقطتين كذا ورا اذنك و تحت شعرك نقطتين وبس 

و اخيرا وصلت للنهاية ليا يومين اجهز بالتدوينة هادي ههههههههههه طولت مرا بس ان شاء الله اعجبتكم واستفدتوا
وكل شيء بالممارسة والتدريب يصير بيرفكت وان شاء الله شعوركم دايما حلوة وجميلة وصحية
واذا ما انبسطتي اللحين بشعرك وغيرتي ستايلك متى بتغيري لما تصيري جدة !!
هههههههههههه
حسابي بتويتر والانستقرام والاسك كلوا .. AB00LA  انسخيه وبتلاقيني ان شاء الله
واخيرا لا تنسوا تصلوا على النبي اللهم صل وسلم عليه ..
والسلام عليكم ورحمة الله وبركاتة