غرف الاطفال

                                                         بسم الله الرحمن الرحيم



السلام عليكم ورحمة الله وبركاتة

كيفكم بنات ان شاء الله كويسين .. اليوم تدوينتي كمان حتكون عن الديكور واخترت غرفة الاطفال بناء على طلب الامورة jamela87z
وربي يقدرني اقدم لكم شي مفيد
الموضوع حيكون شوي طويل بس حبيت احطة بتدوينة وحدة فتحملوني رجاءً :*

انا ذوقي جدا بسيط احب الاشياء الهادية والناعمة وما احب ان الالوان تكون صارخة مرا او كثيرة وعلى هذا الاساس
نسقت موضوعي

قسمت الموضوع على شكل نقاط عشان اسهله عليكم

اولا : الأرضية
انا اشوف انها اهم شي بغرفة الاطفال ضروري انها ماتكون مرا تزحلق عشان ما يطيحون او يتعورون بعيد الشر
من الخيارات الحلوة البعيدة عن السيراميك هو الفينيل و الباركية و السجاد حسيتها أأمن على الاطفال من السراميك
وانتي زي ما تحبي
بكتب عيوب كل واحد وميزاتة واش افضل الافضل منها بالنسبة لذوقي


السيراميك :
         
         مميزاته :
1-  تنظيفة سهل جدا
2- يخدم معاك ممكن يستمر سنوات وسنوات اذا احسنتِ اختيار النوعية
3- اشكاله والوانة وانواعه كثيرة ومتعددة
4- فية الغالي و الرخيص



        عيوبة :
1- بارد على اطفالك
2- ممكن يزحلقهم
3- الطيحة عليه احسهاا مرا خطيرة

رأيي : سلامة اطفالك اهم مع انو الخيار الامثل في النظافة اذا كنتي تدوري عليها ويخدم معاك زي ماقلت اول

و كخيار يجمع بين الامان و النظافة ممكن تاخدي سجادة نوعيتها كويسه وتفرشيها على كل السيراميك ومتى ما حسيتي انو اولادك كبروا تشيلي السجادة اذا حبوا يغيروا غرفتهم و ما يمنع تغسليها بالمغاسل المتخصصة بين كل فترة وفترة
والسيراميك الافضل انو يكون لون محايد وما تمل منو العين مثلا زي البيج السادة



بالنسبة للصور ما راح تحتاري لانو زي ما قلت اشكالة كثيرة ومتنوعة اترككم مع كم صورة وممكن كمان تبحثي بقوقل على الصور

صورة مشابهه للي ببالي ناعم ونظيف وفاتح يناسب كل الالوان طبعا هذا مو ابيض بس اضاءة الشمس مخليته ابيض
افضل خيار لبيت العمر ولكل مكان بالبيت ما عدا المطابخ والحمامات طبعا << رأيي الشخصي طبعا 3>

خيار ثاني اكثر خشونة من الاول بس مو احلى طبعاً





ثانيا : الباركية (( ارضيات الخشب ))


مميزاتة :
1- انيق جداً جداً
2- متعدد  الالوان والاشكال الخشبية
3- دافي على اطفالك
4- بالنسبة للامان افضل من السيراميك


عيوبة :
1- مع الموية ممكن يعفن
2- اكثر قابلية للحشرات


عيوبة تختفي اذا تم تركيبة كويس في منو انواع الصيني الفرنسي و الايطالي شفتو بالسريع عليه ضمان لمدة 10 سنوات لازم الارض كاساس تكون مستوية وينحط لباد تحته وعلى الجوانب حاجة اسمها سيكلو


رأيي مرررررررا جممممميل << بموت عليه 3>
اذا حبيتي شكله توكلي على الله وسوية له منظف خاص اذا اعتنيتي فيه بيعيش معاك وسمعت انو بامكانك تنقلية لغرفة ثانية


الصور :

يا جماله يا نااااس

هادي الصورة اللي تحت مو متاكدة منها هي يا فينيل بالقطع او باركية 

ثالثاً : الفينيل

هو زي المشمع اذا تعرفوه بس اتخن بكثير وعملي جداا بعض المستشفيات مركبته

مميزاتة :
1- يتنظف بسهولة زي ما تنظفي السيراميك
2- امن على اطفالك في حال بعيد الشر طاحوا او شي << اقل ضرر من السيراميك ان شاء الله
3- دافي مو بارد زي السيراميك
4- اشكالة جميلة جداً واغلبهاا زي ارضيات الباركية بالشكل وتلاقي كمان شيء يناسب الاطفال


عيوبة :
1- ممكن يتشقق اذا طاح عليه شي حاد
2- ممكن تعلم فيه الاقلام اذا رسموا عليه اولادك و ابدعوا هههههههه
3- ممكن يترك عليه الاثاث علامات اذا كانت جودتة مو كويسة
4- اذا تركب وتلزق كويس ما يخوف اما اذا لا فممكن تدخل تحتو الموية ويصير فيه عفن وهذا الشيء ما نبغاه بغرف اطفالنا
5- احرصي انك ما تحركي الاثاث عليه عشان ما يتشقق




رأيي : ااكيد انا اشوفة افضل شيء لغرف الاطفال لامانة عليهم اذا حبيتيه ممكن تاخذية وتفرشي سجادة صغيرة يجلسوا عليها اولادك ويرسموا ويلعبوا بالالوان
اذا كانت شقتك اوبيتك ايجار كويس لك ما يحتاج تكسير وبهذلة و امكن يوافق صاحب الملك او لا ف انا اشوفة خيار مناسب



الصور :

و هادي بس بعض اشكالة .. وحتلاقون كثيرر وبتحتاروا كمان






ثانيا : البوية


انا افضل البيج او الابيض عشان ما يجبرك على لون معين وخلي الالوان للستاير وفرشاتهم والديكور الباقي



ثالثا : الديكورات الصغيرة ( السرير - الستاير - السجاد - سلات الالعاب -المكتب - التسريحة - الاضاءة)



السرير :
حلو انو يكون ابيض او سود

الالوان مرا حلوة وهادية وجميلةة

السرير هذا شفت منو اسود بايكيا مرا حلوو

هادي الغرفة احس تنفع للاولاد بعيد عن اللون السماوي اللي ما احبة

غرفة اولاد وبنات حبيتهاا ويمكن اطبقها كمان 

حبيتهااا حسيتها مريحة للعين

الستاير :


اختاري لونها ممتع وحلو

فيه موديلات كثير اختاري الموديل المناسب لك افضل البسيطة و القصيرة احسها تعطي وسع بالمكان

^^وممكن تكون زي كذا  بدون الشي اللي فوق ما حبيته يكون قماش ثقيل فوقه قماش خفيف

وانتي واختياارك ..



السجاد :

 اختاري لون يتحمل كرف البزورة وحوستهم


سلات الالعاب :

فيه اشياء كثيرة تقدري تنظمي العاب اولادك فيها شفت احسن حل واسرع حل انك تاخذي سلتين وترمي فيها العاب اولادك وممكن الطفل هو بنفسه يجمع العابة


المكتب :
 ضروري ضروري يكون عند الطفل مكتب تكون عليه اشيائه بيساعده على الابداع و يعلمه النظام والترتيب اذا كان طفلك عمره 5 سنوات بسرعة سوي لو مكتب
وبتكون كمان مساحة للعب

كم صورة للتوضيح

اخيرا الاضاءة :
نصيحة خلي انارتها ابيض واصفر وكمان خلي كمان ضوء ممكن تعليه وممكن توطيه عشان وقت النوم اذا طفلك ما يحب الظلام


ودحين بنزل كم صورة لاستغلال المساحات واختاري الفكرة اللي تناسب بيتك وبيكون سهل تنفيذها لو رحتي لنجار شاطر

اخيرراا وبعد ما خلص البوست اتمنى انكم استمعتوا فيه وما كان ثقيل دم عليكم حبيت اقدم لكم كل اللي عندي وان شاء الله انكم استفدتوا ولو فايدة صغيرة اذا حبيبتوا البوست انشروه بين اللي تحبونهم واللي ما تحبونهم كمان هههههههه
شكرا للي وصلت نهاية البوست حسيتوو مراا طويل ولا ؟؟

تابعوني على تويتر @ab00la
واذا عندكم اي ملاحظة او استفسار اتقبلها بكل صدر رحب
والسلام عليكم ورحمة الله وبركاتة