عشاء سريع وسهل : عجة البيض بالخضار

السلام عليكم ورحمة الله وبركاتة ..

ازيكم النهردة ان شاء الله كويسين .. حبدأ سلسلة جديدة لمطبخي وهيا عشاء سهل .. يعني طبخات سريعة وسهله تنفع عشاء وممكن احيانا فطور

و اليوم التدوينة حتكون عجة البيض بالخضار .. الطبخ زي ما قلت مو قرآن منزل تقدري تغيري اللين بس .. خصوصا العجة مو لكل دولة طريقة لكل بيت طريقة خخخخ


و العجة لها طرق كثيرة  وتقدري تضيفي مكونات كثير ومتنوعة و القيمة الغذائية فيها كبيرة وعالية
وطعمه كمان .. تقدري تضيفي زهرة فلفل رومي بروكلي فطر اللي يطري لك



نبدأ فعجتي وطريقتها ..

المقادير :

بيض
طماطم
 بصل اخضر
كزبرة وتقدري تحطي شبت وبقدونس

بصل عادي + ثوم

بطاطس مقطعة مكعبات ومقلية

دقيق ملعقة وحدة منخولة
باكنج باودر ملعقة صغيرة
صلصة بالسميك
كمون
كزبرة ناشفة
كاري حطيت ملعقة كبيرة عشان ابغى طعمه قوي وبارز
فلفل احمر مطحون
كمون
فلفل اسود
ملح





الطريقة :


الطريقة ببساطة قطعي الخضار كلو .. تقدري تستغني عن البصل او اي شيء مو حابتة باستثناء المكونات الاساسية اللي هيا البيض الباكنج باودر والدقيق و الكزبرة

و اخلطيها مع بعض

وبعدين حطي البهارات زي ما تحبي كثري او قللي حسب ذوقك بالاكل .. أنا حطيت ملعقة ملح وملعقة صغيرة من كل البهارات اللي ذكرتها اول  انخلي الدقيق مع الباكنج باودر

وطبعا نجم الطبخة البيض اخفقيه كويس خليه ينتفخ شويه

و اخلطيها سويا

وحطيها بصينية تيفال او ادهني صينيتك بزيت او زبدة

و على الفرن بحرارة متوسطة انا حطيتها على 200 عشرة دقايق الى ربع ساعة لا تخليها مرا تنشف
وبس بالعافية تقدري تاكليها بخبز ولا بدون خبز احنا اكلنها كذا مرا لذيذة

لا تنسون شاركوني تطبيقاتكم  ,, وبس لا تنسوا تصلوا على النبي والسلام عليكم ورحمة الله وبركاتة