عالمك الجميل .. دلعيه !!

السلام عليكم ورحمة الله وبركاته
كيفكم بنات اليوم التدوينة خفيفة مجرد افكار اشاركم فيها
وهي عن عالمنا الجميل والحلو وهو السرير ❤❤❤


من الأشياء اللي ضايقتني لما كنت أدور أي غرفة نوم سعرها مناسب
و كمان جميلة
يعجبني كل شيء بالغرفة ما عادا السرير
كثير غرف شفتها وكانت أسرتها بايخة
المهم اخر شيء حصلت شيء بسيط وعادي مؤ عاجبني لكن افضل من اللي موجود و حاخد من الافكار هادي لاعادة تدوير السرير
بس مو دحين بعدين لانها لسا جديدة و  عشان ما احد ينجلط ههههههههههه <<< ما تقصد اللي دفع ابدا

اللحين جيت أساعدكم بكم صورة وفكرة بإمكانك انتي تفصليها أو تستخدمي شيء موجود عندكم وتسوين لها إعادة تدوير ❤❤❤


يلا نبدا ....
اول وحدة شي بسيط راس السرير عادي جدا اضافوا لوحتين سوت حركة جمالية طبعا السرير تقدري تاخدية من ايكيا

وهادي الغوا راس السرير واعتمدوا على الجدار نفسه وحطوا ورق جدران جميل جدا وتقريبا هادي الفكرة وفكرة ثانية حوريكم  اياها بعد شوية  هي اللي حابتها وحطبق وحدة منها ان شاء الله

وهادي خشب خشب خشب ما ادري شكلها جميل لكن ما حبيت الفكرة  وحسيتها صعبة وما اظن بتعب نفسي واسويها

وهنا راس سرير مودرن على كلاسيك حبيت اللوحات مرا وخصوصا انو وسطها حبيبة البنات المراية ...

هذا راس سرير خشب منحوت تقدري تحفظي الصورة وتوديها لنجار اذا عجبتك و بايش مزينينها ؟؟؟؟؟
ايوا بصحون كفكرة حلوة لكن اني احط صحون فوق راسي ابدا لا انا اذا كانت على الطاولة جنبي  في حرب بيني وبينها فما بالك فوق راسي ههههههههههههه

وهدا جدا جمممممميل وحالم حسيته كيووووت مرا  راس السرير باب سووا له اعادة تدوير واستخدموه وزينوه اتوقع اتوقع اذا ماخب ظني انو راس سرير نفر وقديم !!

هذا الراس ما ادري اذا عرفتوه او لا عندنا بجدة وبحارة اهلي
لانو البيوت قديمة وغالبا تكون دورين بسطح فهيا تعتبر واطية لانو العالم تطور وصاروا يبنوا عماير وسط الحارة فصار السطح مكشوف او كاشف يعني ما نقدر نطلع بالسطح فكان اسرع حل لاهل البيوت الدورين يغطوا الجدران بهنقر او زنك وهوا صفايح حديد او المونيوم << قصة طويلة عريضة ما ادري ليش قلتها سلكوا لي ههههههههههه

فهنا راس السرير هو الهنقر حق الحارة بس مقصوص بشكل جميل وملون بلون فضي حلو

وهنا كمان بابين قديمة و مستفيدين منها بدل ما يرموها

الفكرة مرا حلوة للاولاد لوحة كبيرة ومكتوب عليها كتابات وطالعة حلوة فما بالكم لو مكتوب عليها بالخط العربي و الخط العربي لوحدة لوحة جمالية

وهنا مستخدمين بارتشن اشوفة بالمطاعم وكمان اهلي كان عندهم منه شكلي بجيبة واحط ورا سريري ههههههههه

وهنا كمان مستخدمين الخشب وقاصينه بشكل جميل

وهنا مستخدمين الستاير ( البلاك اوت ) عجبتني الفكرة ..

هنا كمان مستخدمين البارتشين وشكلة بسيط

هنا ما حبيته مرا بس لتعدد الافكار والاذواق  جبته

هنا راس السرير ملبس قماش روعه وتقدري تفصليه لو حبيتيه

هنا فكرة جممممممميلة وتنفع لغرف الاولاد كمان هو عبارة عن لوحة كبيرة علقوها وحطوا السرير بس عملت منظر جميل

وهنا صحون اكثر للي ما تخاف على راسها هههههههههههه

 

وهنا سبورة طباشير مقصوصة ومرسوم عليها  فكرة غريبة !!

وهنا راس خشب  حسيته ينفع لشالية لاستراحة بس للبيت ما تقبلت الفكرة ما ادري حسيت يبغاله جوو رايق مرا

و هذا الشكل اللي ممكن تحصليه بسيط جدا  

 

وهنا زي اللي فوق ملبس قماش بالوان جميلة << حبيتههه

واخر صورة هي الفكرة الثانية اللي عاجبتني و بسويها لسريري اذا فاكرين الاولى اللي هيا ورق جدران
لمبات صغيرة على الشباك ( او بدون شباك ) ودانتيل او شيفون عليها  معطيه منظر حالم و رومنسي مرا مع ستارتين بيج كريمي رووووووعه مرا حابة هالفكرة

وصلنا لاخر الموضوع استعرضت لكم فيه كم صورة للاسرة وان شاء تاخذوا منها الهام خلاص ملينا من المكرر والكلاسيك والمودرن الميت اللي ما فيه حياة حاولوا تغيروا لان التغيير عنجد يغير النفسية

واخيرا  حابة اقولكم اني بنقطع فترة عشان المخروبة الجامعة واختباراتها ههههههه فادعوا لي اقدم اختبارات كويسة
وبس لا تنسوا تصلوا على النبي
والسلام عليكم ورحمة الله وبركاتة ............

تعليقك واشتراكك بمدونتي يسعدني 

*___*